തിരുവനന്തപുരം: ഇനി ലോകത്തിന്റെ ഏത് കോണിലിരുന്നും ശാന്തികവാടത്തിലെ സംസ്കാര ചടങ്ങുകൾ തൽസമയം കാണാം. ശാന്തികവാടത്തിലെ ലൈവ് സ്ട്രീമിങ് സംവിധാനം മേയർ കെ ശ്രീകുമാർ ഉൽഘാടനം ചെയ്തു. ശാന്തികവാടത്തിലെ സേവനങ്ങൾ ഓൺലൈനായി ബുക്ക് ചെയ്യാനും ഇനി സൗകര്യമുണ്ടാകും.
അത്യാധുനിക വെബ് ക്യാമറകൾ, തൽസമയ സംപ്രേക്ഷണത്തിനുള്ള കൺട്രോൾ റൂം, പുതിയ രണ്ട് ക്രിമറ്റോറിയങ്ങൾ എന്നിവ ഒരുക്കിയിട്ടുണ്ട്. കോവിഡ് മാനദണ്ഡങ്ങൾ നിലനിൽക്കുന്നതിനാൽ ബന്ധുക്കൾക്കും സുഹൃത്തുക്കൾക്കും സംസ്കാര ചടങ്ങുകളിൽ പങ്കെടുക്കുന്നതിന് നിയന്ത്രണമുണ്ട്. ഇക്കാര്യം പരിഗണിച്ചാണ് വെബ് സ്ട്രീമിങ് എന്ന ആശയത്തിലേക്ക് നഗരസഭ എത്തിയത്.
മൂന്നാഴ്ച കൊണ്ട് ലൈവ് സ്ട്രീമിങ്ങിനുള്ള പണി പൂർത്തിയാക്കി. ശാന്തികവാടത്തിലെ എട്ട് ഫർണസുകളിലെയും സംസ്കാര ചടങ്ങുകൾ സ്മാർട്ട് ട്രിവാൻഡ്രം വെബ് പോർട്ടലിലൂടെയും മൊബൈൽ ആപ്ളിക്കേഷനിലൂടെയും ഇനി തൽസമയം കാണിക്കാനാണ് തീരുമാനം. ഇതോടൊപ്പം 24 മണിക്കൂറും പ്രവർത്തിക്കുന്ന നഗരസഭാ കോൾ സെന്ററിന്റെ സേവനവും പ്രയോജനപ്പെടുത്താം. ഫോൺ: 9496434488 (കോൾ സെന്റർ), 04712323574 (ശാന്തികവാടം). പ്രവർത്തന മേൽനോട്ടത്തിനായി ഹെൽത്ത് ഓഫീസറെയും നിയമിച്ചിട്ടുണ്ട്. (ഫോൺ: 9496434410).
Also Read: ‘മാവോയിസ്റ്റുകളെ വെടിവെച്ച് കൊല്ലുന്നത് ശരിയല്ല; തണ്ടര്ബോള്ട്ട് പിന്വാങ്ങണം’; കാനം