മണിപ്പൂർ: പോലീസുകാരെ വീട്ടുജോലിക്ക് നിയോഗിച്ച ഐപിഎസ് ഉദ്യോഗസ്‌ഥനെ സസ്‌പെൻഡ്‌ ചെയ്‌തു. മണിപ്പൂർ റൈഫിൾസിന്റെ 7 ബിഎൻ കമാൻഡന്റായ പിജി സിംഗ്സിത്തിനാണ് സസ്‌പെൻഷൻ ലഭിച്ചത്.
മുഖ്യമന്ത്രി എൻ ബിരേൻ സിംഗിന്റെ നിർദേശപ്രകാരമാണ് നടപടി. സംസ്‌ഥാനത്തെ ജനങ്ങൾക്ക് സുരക്ഷ ഒരുക്കേണ്ട പോലീസിൽ നിന്നും ഇത്തരം പ്രവർത്തി അംഗീകരിക്കാൻ കഴിയില്ലെന്ന് എൻ ബിരേൻ സിംഗ് പറഞ്ഞു. മുഖ്യമന്ത്രിയുടെ അധ്യക്ഷതയിൽ ചേർന്ന ഡിജി, ചീഫ് സെക്രട്ടറി, ഐജി, മറ്റ് നേതാക്കൾ എന്നിവരുടെ യോഗത്തിലാണ് തീരുമാനം.
വീട്ടുജോലികൾക്കായി 15 പോലീസുകാരെയും, ഫാംഹൗസിൽ നിർമ്മാണ പ്രവർത്തികൾക്കായി 19 ഉദ്യോഗസ്‌ഥൻമാരെയും ഐപിഎസ് ഓഫിസർ നിയോഗിച്ചിട്ടുണ്ടെന്ന് കണ്ടെത്തിയതായി മുഖ്യമന്ത്രി അറിയിച്ചു. ഡിജിയും ഐജിയും നടത്തിയ പരിശോധനയിലാണ് ഇക്കാര്യങ്ങൾ വ്യക്‌തമായത്.
Read also: പെഷവാറിൽ ഐബി ഉദ്യോഗസ്‌ഥർക്ക് നേരെ വെടിവെപ്പ്; ഒരു മരണം
