മലപ്പുറം: പ്രവാചകൻ മുഹമ്മദ് നബി(സ) തിരുപ്പിറവിയാഘോഷം സാന്ത്വന പ്രവർത്തനങ്ങളാൽ ധന്യമാക്കാൻ വിശ്വാസികൾ മുന്നിട്ടിറങ്ങണമെന്ന് കേരള മുസ്ലിം ജമാഅത്ത് ജില്ലാകമ്മിറ്റി മീലാദ് സന്ദേശത്തിൽ അഭ്യർഥിച്ചു.
വീടുകളിൽ മൗലിദ് സദസുകൾ സംഘടിപ്പിച്ചും ദാനധർമങ്ങൾ നടത്തിയും ആലംബഹീനർക്ക് അത്താണിയാകാൻ വിശ്വാസികൾക്കാകണം. പരസ്പര സ്നേഹവും സൗഹാർദവും ഊട്ടിയുറപ്പിച്ച് നബിദിനാഘോഷങ്ങൾ അർഥപൂർണമാക്കണം. മുഹമ്മദ് നബി(സ) സഹിഷ്ണുതയുടെ മാതൃക എന്ന ശീർഷകത്തിലാണ് നബിദിന ആഘോഷ പരിപാടികൾ നടത്തുന്നത്.
സ്വന്തം ജീവിതത്തിൽ പ്രവാചക അധ്യാപനങ്ങൾ ഉൾക്കൊണ്ട് മാതൃകയാകണം. കുടുംബങ്ങളിലും അയൽവാസികൾ തമ്മിലും പങ്കുവെക്കലുകൾ ഊർജിതപ്പെടുത്താൻ ഈ അവസരം പരമാവധി വിനിയോഗിക്കണം; സന്ദേശത്തിൽ പറഞ്ഞു. ജില്ലാ പ്രസിഡണ്ട് കൂറ്റമ്പാറ അബ്ദുറഹ്മാൻ ദാരിമി, ജനറൽ സെക്രട്ടറി പിഎം മുസ്തഫ കോഡൂർ, ഫിനാൻസ് സെക്രട്ടറി എംഎൻ കുഞ്ഞഹമ്മദ് ഹാജി എന്നിവർ സംയുക്തമായാണ് സന്ദേശം പുറത്തിറക്കിയത്.
Most Read: സ്കൂളിന് ഭൂമി വാങ്ങാൻ കഴുത്തിൽ കിടന്ന സ്വർണമാല ഊരിനൽകി അധ്യാപിക