തിരുവനന്തപുരം: സംസ്ഥാനത്ത് പുതുതായി ആരംഭിക്കാൻ ബെവ്കോ ശുപാർശ ചെയ്ത മദ്യശാലകളിൽ ഏറ്റവും കൂടുതൽ എണ്ണം തൃശൂർ ജില്ലയിൽ. 23 മദ്യശാലകൾ തൃശൂരിൽ ആരംഭിക്കാനാണ് ശുപാർശ നൽകിയിരിക്കുന്നത്. ആകെ 175 പുതിയ മദ്യശാലകൾ സംസ്ഥാനത്ത് ആരംഭിക്കാനാണ് ബെവ്കോയുടെ ശുപാർശ.
ജനസാന്ദ്രത കണക്കിലെടുത്ത് നഗര പ്രദേശങ്ങളിൽ 91 മദ്യശാലകളും, ഗ്രാമ പ്രദേശങ്ങളിൽ 84 മദ്യശാലകളും ആരംഭിക്കാനാണ് ബെവ്കോ ശുപാർശയിൽ വ്യക്തമാക്കിയത്. എന്നാൽ ഇതിൽ ഏതൊക്കെ മദ്യശാലകളാണ് പുതുതായി ആരംഭിക്കുകയെന്ന കാര്യത്തിൽ അന്തിമ തീരുമാനം ആയിട്ടില്ല.
ബെവ്കോയുടെ ശുപാർശ പ്രകാരം തിരുവനന്തപുരം-22, കൊല്ലം-18, പത്തനംതിട്ട-6, ആലപ്പുഴ-21, കോട്ടയം-9, ഇടുക്കി-6, എറണാകുളം-11, തൃശൂർ-23, പാലക്കാട്-14, മലപ്പുറം-12, കോഴിക്കോട്-12, വയനാട്-5, കണ്ണൂർ-11, കാസർഗോഡ്-5 എന്നിങ്ങനെയാണ് ഓരോ ജില്ലകളിലും ആരംഭിക്കുന്ന മദ്യശാലകൾ. നേരത്തെ പൂട്ടിപ്പോയ മദ്യശാലകളാണ് ഇപ്പോൾ തുറക്കുന്നവയിൽ മിക്കവയും.
Read also: ജനങ്ങൾക്ക് വീണ്ടും തിരിച്ചടി; പാചകവാതക സിലിണ്ടറിന് 3.50 രൂപയുടെ വർധന