കൊൽക്കത്ത: ബിജെപി കൊറോണ വൈറസിനേക്കാളും അപകടകാരിയാണെന്ന തൃണമൂൽ കോൺഗ്രസ് എംപി നുസ്രത്ത് ജഹാന്റെ പരാമർശം വിവാദത്തിൽ. നുസ്രത്ത് ജഹാന്റെ പരാമർശത്തിനെതിരെ ബിജെപി രംഗത്തെത്തി. ബാഷിർഹത് മണ്ഡലത്തിൽ നടന്ന പരിപാടിക്ക് ഇടയിലാണ് എംപിയുടെ വിവാദം പരാമർശം.
നിങ്ങളുടെ കാതുകളും കണ്ണുകളും തുറന്നുവെക്കൂ. കാരണം നിങ്ങൾക്ക് ചുറ്റുമുള്ള ചിലർ കൊറോണയേക്കാളും അപകടകാരികളാണ്. എന്താണ് കൊറോണയേക്കാളും അപകടകരമെന്ന് നിങ്ങൾക്ക് അറിയാമോ? അത് ബിജെപിയാണ്. കാരണം അവര്‍ക്ക് നമ്മുടെ സംസ്‌കാരമെന്തെന്ന് അറിയില്ല. മനുഷ്യത്വം അവർക്ക് മനസിലാകില്ല. നമ്മുടെ കഷ്‌ടപ്പാടിന്റെ മഹത്വം അവർക്ക് മനസിലാകില്ല.
ബിസിനസ് മാത്രമാണ് അവർക്ക് അറിയാവുന്നത്. അവരുടെ കയ്യിൽ ഒരുപാട് പണമുണ്ട്. അതെല്ലായിടത്തും പടർത്തുകയാണവർ. മതത്തിന്റെ പേരില്‍ ജനങ്ങളെ പരസ്‌പരം ഏറ്റുമുട്ടിച്ച് കലാപമുണ്ടാക്കുന്നു. നുസ്രത്ത് ജഹാൻ പറഞ്ഞു.
നുസ്രത്തിന്റെ പ്രസ്‌താവന പുറത്ത് വന്നതിന് പിന്നാലെ ബിജെപി ശക്‌തമായ പ്രതിഷേധവുമായി രംഗത്തെത്തി. ബിജെപിയുടെ സമൂഹമാദ്ധ്യമ തലവനും ബംഗാൾ തിരഞ്ഞെടുപ്പ് കോ–കൺവീനറുമായ അമിത് മാളവ്യ മുഖ്യമന്ത്രി മമത ബാനർജിക്ക് എതിരെ രംഗത്ത് വന്നു. പ്രീണന രാഷ്‌ട്രീയമാണ്‌ തൃണമൂലിന്റെ ലക്ഷ്യമെന്ന് മാളവ്യ പറഞ്ഞു.
Read Also: ‘ഞാൻ തൃണമൂലിന് ഒപ്പം തന്നെ’; സസ്‌പെൻസ്‌ അവസാനിപ്പിച്ച് നടി ശതാബ്‌ദി റോയ്
