ന്യൂഡെൽഹി: നിയമസഭാ തിരഞ്ഞെടുപ്പിന് ശേഷം ബിജെപി അധികാരം നിലനിർത്തിയാൽ ഉത്തരാഖണ്ഡിൽ ഏകീകൃത സിവിൽ കോഡ് നടപ്പാക്കുമെന്ന മുഖ്യമന്ത്രി പുഷ്കർ സിംഗ് ധാമിയുടെ പ്രസ്താവനയിൽ പ്രതികരണവുമായി മുതിർന്ന കോൺഗ്രസ് നേതാവ് കപിൽ സിബൽ. ഏകീകൃത സിവിൽ കോഡ് നടപ്പാക്കുമെന്ന പ്രഖ്യാപനത്തിലൂടെ നിങ്ങളുടെ പാർട്ടിയെയും നിങ്ങളെയും നാണം കെടുത്തരുതെന്ന് സിബൽ ധാമിയോട് പറഞ്ഞു.
നിയമസഭാ തിരഞ്ഞെടുപ്പിന് രണ്ട് ദിവസം മുമ്പ് ഇത്തരമൊരു അവകാശവാദം ഉന്നയിക്കുന്നത് ഉത്തരാഖണ്ഡിൽ ബിജെപി തോൽക്കുകയാണ് എന്നതിന്റെ തെളിവാണെന്നും ധാമിക്ക് ചില നിയമോപദേശം ആവശ്യമാണെന്നും കപിൽ സിബൽ പറഞ്ഞു.
Pushkar S Dhami
Please don’t embarrass your party and yourself when you make announcements about implementing the Uniform Civil Code in Uttarakhand if BJP comes to power
This shows your party is losing in Uttrakhand
and that
You need some legal advice— Kapil Sibal (@KapilSibal) February 12, 2022
സംസ്ഥാനത്ത് ബിജെപി അധികാരത്തിൽ എത്തിയാൽ ഉടൻ ഏകീകൃത സിവിൽ കോഡ് നടപ്പാക്കുമെന്നാണ് ധാമിയുടെ പ്രഖ്യാപനം. ബിജെപി പുതിയ മന്ത്രിസഭ രൂപീകരിച്ചാൽ ഉടൻ തന്നെ വിവാഹം, വിവാഹമോചനം, പരമ്പരാഗത സ്വത്ത്, ദത്ത്, ജീവനാംശം എന്നീ വിഷയങ്ങളിൽ പൊതുവായ നിയമം കൊണ്ടുവരാനുള്ള ഏകീകൃത സിവിൽ കോഡിന്റെ കരട് തയ്യാറാക്കാൻ ഒരു കമ്മിറ്റി രൂപീകരിക്കുമെന്ന് ധാമി പറയുന്നു.
ഭരണഘടനക്ക് രൂപം നൽകിയവരുടെയും ഭരണഘടനയുടെ ആത്മാവിനെ ദൃഢമാക്കിയവരുടെയും സ്വപ്നങ്ങൾ സാക്ഷാത്കരിക്കുന്നതിലേക്കുള്ള പ്രധാന ചുവടുവെപ്പായിരിക്കും ഇതെന്നും അദ്ദേഹം പറഞ്ഞു. ഏകീകൃത സിവിൽ കോഡ് നടപ്പിലാകുന്നതോടെ സംസ്ഥാനത്തെ എല്ലാവർക്കും തുല്യ നീതി ലഭിക്കും. ലിംഗ സമത്വം, സാമൂഹിക സൗഹാർദം എന്നിവ ശക്തിപ്പെടുത്താൻ ഏകീകൃത സിവിൽ കോഡ് സഹായിക്കുമെന്നും പുഷ്കർ സിംഗ് ധാമി പറഞ്ഞു.
Most Read: പൂക്കളിൽ വിസ്മയമൊരുക്കി മുഗൾ ഗാർഡൻ; ഇന്ന് മുതൽ ജനങ്ങൾക്ക് പ്രവേശനം