കോഴിക്കോട് : കോഴിക്കോട് മിട്ടായിത്തെരുവിലെ പില്ലര്‍ ഫയര്‍ ഹൈഡ്രന്റുകളുടെ ഭാഗങ്ങള്‍ മോഷ്ട്ടാക്കള്‍ കൊണ്ടുപോയി. തീപിടുത്തമുണ്ടാകുമ്പോള്‍ അണക്കാന്‍ വേണ്ടിയാണ് പില്ലര്‍ ഫയര്‍ ഹൈഡ്രന്റുകള്‍ സ്ഥാപിച്ചിരുന്നത്. ഇതിന്റെ പിച്ചളയില്‍ നിര്‍മ്മിച്ച ലെഗ്, ലിവര്‍, വാഷര്‍ തുടങ്ങിയ ഭാഗങ്ങളാണ് മോഷണം പോയത്. പിന്നീട് ബീച്ച് ഫയര്‍ സ്റ്റേഷന്‍ ഉദ്യോഗസ്ഥരുടെ നേത്യത്വത്തില്‍ പുതിയ ഭാഗങ്ങള്‍ പിടിപ്പിച്ചു.
മിട്ടായിത്തെരുവില്‍ ആകെ 8 പില്ലര്‍ ഫയര്‍ ഹൈഡ്രന്റുകളാണ് ഉണ്ടായിരുന്നത്. 2 വര്‍ഷം മുന്നേയാണ് ഇവ ഇവിടെ സ്ഥാപിച്ചത്. ഇതില്‍ 6 എണ്ണവും മോഷ്ടാക്കള്‍ കൊണ്ടുപോയി. ഇന്നലെയോടെ5 എണ്ണം നവീകരിച്ച് പുനസ്ഥാപിച്ചു. തീപിടുത്തമുണ്ടായാല്‍ അഗ്‌നിരക്ഷാസേന എത്തി ഹോസുകള്‍ പിടിപ്പിച്ച് വെള്ളം ചീറ്റാനാണ് പില്ലര്‍ ഫയര്‍ ഹൈഡ്രന്റുകള്‍ ഉപയോഗിക്കുന്നത്. വളരെ വേഗത്തില്‍ തീയണക്കാന്‍ സാധിക്കുമെന്നതാണ് ഇതിന്റെ പ്രത്യേകത. ബീച്ച് ഫയര്‍ സ്റ്റേഷന്‍ ഓഫിസര്‍ പി സതീഷ് ഉദ്യോഗസ്ഥരായ കെ സദാനന്ദന്‍, എം മനോജ്കുമാര്‍ എന്നിവരുടെ നേതൃത്വത്തിലാണ് പില്ലര്‍ ഫയര്‍ ഹൈഡ്രന്റുകള്‍ പുനസ്ഥാപിച്ചത്.
