പെട്ടിമുടി : രാജമലയിലെ പെട്ടിമുടിയിലുണ്ടായ ഉരുള്പൊട്ടലില് കാണാതായവര്ക്കായുള്ള തിരച്ചില് രണ്ടുദിവസത്തേക്ക് നിര്ത്തിവച്ചു. കാലാവസ്ഥ മോശമായതിനെ തുടര്ന്നാണ് തിരച്ചില് നിര്ത്തിവെക്കാന് തീരുമാനിച്ചത്. തിരച്ചില് തുടരുന്നത് സംബന്ധിച്ച കാര്യത്തില് തീരുമാനം എടുക്കാനായി മൂന്നാറില് യോഗം ചേര്ന്നിരുന്നു. അതിന്റെ അടിസ്ഥാനത്തിലാണ് തീരുമാനം. മോശം കാലാവസ്ഥ വനമേഖലയില് തിരച്ചില് നടത്തുന്നതിന് കൂടുതല് തടസ്സമായി.
തുടര്ന്നുള്ള തിരച്ചിലിന് മാര്ഗ്ഗരേഖ തയ്യാറാക്കുന്നതിനായി നാളെ പ്രത്യേക സംഘം പെട്ടിമുടി സന്ദര്ശിക്കും. അതിന്റെ അടിസ്ഥാനത്തിലായിരിക്കും തിരച്ചില് പുനരാരംഭിക്കുന്നത്.
ഉരുള്പൊട്ടലില് കാണാതായ അഞ്ച് പേരെ ഇനിയും കണ്ടെത്താനുണ്ട്. കഴിഞ്ഞ രണ്ട് ദിവസങ്ങളില് മേഖലയില് നടത്തിയ തിരച്ചിലില് ആരെയും കണ്ടെത്താനായില്ല. ഇതിനോടകം തന്നെ പരമാവധി മേഖലയില് തിരച്ചില് നടത്തിയെന്നാണ് അധികൃതര് നല്കുന്ന വിവരം. കഴിഞ്ഞ ഓഗസ്റ്റ് ഏഴാം തീയതിയാണ് രാജമലയിലെ പെട്ടിമുടിയില് ഉരുള്പൊട്ടല് ഉണ്ടായത്.