പട്ടാമ്പി: മികവിന്റെ കേന്ദ്രമായി സർക്കാർ പ്രഖ്യാപിച്ച പട്ടാമ്പി ഗവൺമെന്റ് സംസ്‌കൃത കോളേജിൽ നിർമാണം പൂർത്തിയായ സയൻസ് ബ്‌ളോക്കിന്റെ ഉൽഘാടനം മുഖ്യമന്ത്രി പിണറായി വിജയൻ നിർവഹിക്കും. ഇന്ന് വൈകിട്ട് 4.30ന് ഓൺലൈനായാണ് ചടങ്ങുകൾ നടക്കുക.
ചടങ്ങിൽ ഉന്നതവിദ്യാഭ്യാസ മന്ത്രി കെടി ജലീൽ അധ്യക്ഷത വഹിക്കും. മുഹമ്മദ് മുഹ്‌സിൻ എംഎൽഎ ശിലാഫലകം അനാഛാദനം ചെയ്യും. 36 കോടി രൂപയോളമാണ് പുതിയ കെട്ടിടത്തിന്റെ നിർമാണ ചെലവ്. 1,81,968 ചതുരശ്രയടി വിസ്‌തീർണത്തിൽ മൂന്ന് നിലകളിലാണ് കെട്ടിടം നിർമിച്ചിരിക്കുന്നത്.
കെട്ടിടത്തിൽ 36 ക്‌ളാസ്‌മുറികൾ സജ്‌ജമാക്കിയിട്ടുണ്ട്. ഇതോടെ പട്ടാമ്പി ഗവ.സംസ്‌കൃത കോളേജിലെ ഭൗതിക സാഹചര്യത്തിൽ വലിയ വർധനവ് ഉണ്ടാകും. 14 പരീക്ഷണശാലകളും ആറ് അധ്യാപക റൂമുകളും വകുപ്പുതല അധ്യക്ഷൻമാർക്കുള്ള ആറ് റൂമുകളും ഒരു പ്രിൻസിപ്പൽ റൂമും കെട്ടിടത്തിൽ ഒരുക്കിയിട്ടുണ്ട്.
കൂടാതെ, 9 സെമിനാർ ഹാളുകൾ, 9 കാത്തിരിപ്പ് മുറികൾ, 3 ലൈബ്രറികൾ, 55 വീതം ശൗചാലയങ്ങളും സയൻസ് ബ്‌ളോക്കിലുണ്ട്. സയൻസ് ബ്‌ളോക്ക് തുറന്നുനൽകുന്നതോടെ നിലവിലെ സയൻസ് കോഴ്‌സുകൾ പുതിയ കെട്ടിടത്തിലേക്ക് മാറും. പുതിയ സയൻസ് കോഴ്‌സുകളും തുടങ്ങാനാകും.
നിലവിലെ കോളേജിന്റെ സ്‌ഥല പരിമിതിയും പുതിയ ബ്‌ളോക്ക് വരുന്നതോടെ മാറിക്കിട്ടും. പാലക്കാട്, മലപ്പുറം, തൃശൂർ ജില്ലകളിലുള്ള വിദ്യാർഥികൾക്കടക്കം ബ്‌ളോക്കിന്റെ പ്രയോജനം ലഭിക്കും.
Also Read: അധികാരത്തിൽ എത്തിയാൽ കേരളബാങ്ക് പിരിച്ചുവിടുമെന്ന് പ്രതിപക്ഷ നേതാവ്
