എറണാകുളം: എറണാകുളത്ത് റിപ്പോര്‍ട് ചെയ്‌ത ഷിഗെല്ല രോഗത്തിന്റെ ഉറവിടം കണ്ടെത്താനാകാതെ ആരോഗ്യവകുപ്പ്. എറണാകുളത്ത് ചോറ്റാനിക്കരയിലും വാഴക്കുളത്തുമാണ് ഷിഗെല്ല റിപ്പോര്‍ട് ചെയ്‌തത്. രോഗ ഉറവിടം കണ്ടെത്താനാകാത്തതില്‍ ആശങ്ക നിലനില്‍ക്കുകയാണ്. അതേസമയം, പ്രതിരോധ പ്രവര്‍ത്തനങ്ങള്‍ ആരോഗ്യവകുപ്പ് ശക്‌തമാക്കിയിട്ടുണ്ട്.
രോഗബാധിത മേഖലകളില്‍ മെഡിക്കല്‍ സംഘം പരിശോധന നടത്തി. ഹോട്ടലുകള്‍, വീടുകളിലെ കിണറുകള്‍ കേന്ദ്രീകരിച്ചായിരുന്നു പരിശോധന നടത്തിയത്. വാഴക്കുളത്ത് 39കാരനാണ് രോഗം സ്‌ഥിരീകരിച്ചത്. സ്വകാര്യ ആശുപത്രിയില്‍ ചികില്‍സ തേടിയ ഇദ്ദേഹത്തിന്റെ സാമ്പിളികളുടെ തുടര്‍ പരിശോധന റീജിയണല്‍ പബ്ളിക്ക് ഹെല്‍ത്ത് ലാബിലും, കളമശേരി മെഡിക്കല്‍ കോളജ് ആശുപത്രിയിലും നടത്തിയിരുന്നു. തുടര്‍ന്ന് രോഗം സ്‌ഥിരീകരിക്കുകയായിരുന്നു. ചികില്‍സയെ തുടര്‍ന്ന് ഇദ്ദേഹത്തിന്റെ ആരോഗ്യനില മെച്ചപ്പെട്ടു.
