തിരുവനന്തപുരം: പതിനൊന്നാം ശമ്പളക്കമ്മീഷന് പ്രകാരം ശമ്പളവും പെന്ഷനും 10 ശതമാനംവരെ കൂടാന് സാധ്യതയുണ്ടെന്ന് റിപ്പോര്ട്. മുന് കേന്ദ്ര സെക്രട്ടറി കെ മോഹന്ദാസ് അധ്യക്ഷനായ സമിതി ജനുവരി 31ന് റിപ്പോര്ട് സര്ക്കാരിന് സമര്പ്പിക്കും. അതേസമയം മുന്കാലങ്ങളെ അപേക്ഷിച്ച് കുറവാണ് ഇത്തവണത്തെ ശമ്പളവര്ധന. ഏപ്രില് മുതല് പുതിയ ശമ്പളം നല്കിത്തുടങ്ങും. ഇത്തവണത്തെ സംസ്ഥാന സര്ക്കാരിന്റെ ബജറ്റില് ഇതുസംബന്ധിച്ച് പ്രഖ്യാപനമുണ്ടാവും.
2019 ജൂലായ് ഒന്നുമുതല് പ്രാബല്യത്തോടെയായിരിക്കും പരിഷ്കരണം. നിയമസഭാ തിരഞ്ഞെടുപ്പിന് പെരുമാറ്റച്ചട്ടം വരുന്നതിനു മുമ്പ് ശമ്പളപരിഷ്കരണം സംബന്ധിച്ച ഉത്തരവ് ഇറങ്ങും. തിരഞ്ഞെടുപ്പിന്റെ പശ്ചാത്തലത്തിലാണ് കോവിഡ് സാഹചര്യത്തിലും ശമ്പളപരിഷ്കരണം നടപ്പാക്കാന് സര്ക്കാര് തീരുമാനിച്ചത്. പത്താം ശമ്പളക്കമ്മീഷന് 13 ശതമാനത്തോളം വര്ധനയാണു വരുത്തിയത്. കുറഞ്ഞ ശമ്പളം 17,000 രൂപയും കൂടിയത് 1,20,000 രൂപയും ആക്കിയിരുന്നു.