കോഴിക്കോട്: വനിതാ എസ്ഐയെ പോലീസ് ചട്ടം പഠിപ്പിച്ച സിവിൽ പോലീസ് ഓഫിസർക്ക് സ്ഥലം മാറ്റം. ബേപ്പൂർ സ്റ്റേഷനിലെ സിവിൽ പോലീസ് ഓഫിസർ കെസി ഉമേഷിനെയാണ് നാദാപുരം സ്റ്റേഷനിലേക്ക് സ്ഥലം മാറ്റിയത്.
വാഹനം ഓടിക്കുമ്പോൾ മൊബൈൽ ഫോൺ ഉപയോഗിച്ചതിന് എസ്ഐ പിടികൂടിയ ഡ്രൈവർക്കെതിരെ എഫ്ഐആർ രജിസ്റ്റർ ചെയ്യാൻ സ്റ്റേഷൻ പാറാവ് ഡ്യൂട്ടിയിൽ ഉണ്ടായിരുന്ന സിപിഒയോട് നിർദ്ദേശിച്ചിരുന്നെങ്കിലും അനുസരിച്ചില്ല. തുടർന്നാണ് മെമ്മോ നൽകിയത്. മെമ്മോയ്ക്ക് ഉള്ള ചില പരാമർശങ്ങളാണ് സ്ഥലം മാറ്റം നടപടിക്കിടയാക്കിയത്.
പോലീസ് ചട്ടവും നിയമവും അനുസരിച്ച് കുറ്റകൃത്യം കണ്ടെത്തിയ ഉദ്യോഗസ്ഥൻ തന്നെ എഫ്ഐആർ രജിസ്റ്റർ ചെയ്യണമെന്നും സിപിഒ റാങ്കിലുള്ള പാറാവുകാരന് എഫ്ഐആർ രജിസ്റ്റർ ചെയ്യാൻ അധികാരം ഇല്ലെന്നുമാണ് കെസി ഉമേഷ് മെമ്മോക്കുള്ള മറുപടിയായി പറഞ്ഞത്. മേലുദ്യോഗസ്ഥനെ ബഹുമാനിച്ചില്ലെന്ന് അടക്കമുള്ള ആരോപണങ്ങൾ ചൂണ്ടിക്കാട്ടിയാണ് നടപടിയെന്നാണ് വിവരം.
Most Read: രാജ്യത്ത് പ്രതിദിന രോഗബാധ കുറയുന്നു; 24 മണിക്കൂറിൽ 58,077 രോഗബാധിതർ