ഇടുക്കി: ജലനിരപ്പ് കുറയ്‌ക്കുന്നതിനായി തുറന്ന ഇടുക്കി അണക്കെട്ടിലെ 3 ഷട്ടറുകളിൽ അവസാനത്തേതും അടച്ചു. രണ്ട് ഷട്ടറുകൾ നേരത്തെ തന്നെ അടച്ചിരുന്നു. നിലവിൽ ഡാമിലേക്കുള്ള നീരൊഴുക്ക് കുറഞ്ഞതോടെയാണ് മൂന്നാമത്തെ ഷട്ടറും അടക്കാൻ തീരുമാനിച്ചത്.
കഴിഞ്ഞ 19ആം തീയതിയാണ് ജലനിരപ്പ് ഉയർന്ന സാഹചര്യത്തിൽ ഇടുക്കി ചെറുതോണി അണക്കെട്ടിലെ 3 ഷട്ടറുകൾ 35 സെന്റീമീറ്റർ വീതം തുറന്നത്. തുടർന്ന് മഴ കുറഞ്ഞ സാഹചര്യത്തിൽ കഴിഞ്ഞ 22ന് 2 ഷട്ടറുകൾ അടക്കുകയും, മൂന്നാമത്തെ ഷട്ടർ 40 സെന്റീമീറ്റർ ആയി ഉയർത്തുകയും ചെയ്‌തിരുന്നു.
ജലനിരപ്പ് 2397.90 അടിയിലെത്തിയ സാഹചര്യത്തിലാണ് മൂന്നാമത്തെ ഷട്ടർ അടയ്‌ക്കാൻ ജില്ലാ കളക്‌ടർ അനുമതി നൽകിയത്. ഇത്രയും ദിവസം കൊണ്ട് 46.296 ദശലക്ഷം ഘനമീറ്റർ വെള്ളമാണ് ഷട്ടർ വഴി പുറത്തേക്ക് ഒഴുകിയത്.
Read also: മുല്ലപ്പെരിയാർ ജലനിരപ്പ് 139 അടിയായി നിലനിർത്തണം; കേരളം സുപ്രീം കോടതിയിൽ
