കോഴിക്കോട്: ജില്ലയിലെ മുക്കം നഗരസഭയിൽ 2 വാർഡുകളിൽ ഡെങ്കിപ്പനി സ്ഥിരീകരിച്ചു. നെല്ലിക്കാപ്പൊയിൽ, കണക്കുപറമ്പ് എന്നീ രണ്ട് വാർഡുകളിലാണ് രോഗബാധ ഉണ്ടായത്. ഇതേ തുടർന്ന് ആരോഗ്യവകുപ്പും നഗരസഭാ അധികൃതരും പ്രദേശത്ത് രോഗവ്യാപനം തടയുന്നതിനുള്ള നടപടികൾ ആരംഭിച്ചു.
ഇരു വാർഡുകളിലും ഓരോരുത്തർക്കാണ് ഡെങ്കിപ്പനി സ്ഥിരീകരിച്ചത്. രോഗബാധ കണ്ടെത്തിയതിന് പിന്നാലെ നെല്ലിക്കാപ്പൊയിലിൽ രോഗം സ്ഥിരീകരിച്ച ആളുടെ വീടും, സമീപത്തെ 40 വീടുകളും അണുവിമുക്തമാക്കിയിട്ടുണ്ട്. കോഴിക്കോട് നിന്നും വെക്ടർ കൺട്രോൾ യൂണിറ്റിന്റെ നേതൃത്വത്തിൽ ഫോഗിങ്ങും നടത്തി.
ജൂനിയർ ഹെൽത്ത് ഇൻസ്പെക്ടർ എസ് റോഷൻ ലാൽ, നഗരസഭ കൗൺസിലർമാരായ വിശ്വൻ നികുഞ്ചം, സാറ കൂടാരത്തിൽ എന്നിവരാണ് പ്രതിരോധ പ്രവർത്തനങ്ങളിൽ നേതൃത്വം നൽകിയത്. മുക്കം നഗരസഭയിലെ 12 വാർഡുകളിലാണ് നിലവിൽ കോവിഡ് വ്യാപനത്തെ തുടർന്ന് കർശന നിയന്ത്രണം ഏർപ്പെടുത്തിയിരിക്കുന്നത്. ഇതിനിടയിലാണ് ഇപ്പോൾ 2 വാർഡുകളിൽ ഡെങ്കിപ്പനി കൂടി സ്ഥിരീകരിച്ചത്.
Read also: സമാന്തര ടെലിഫോൺ എക്സ്ചേഞ്ച്; പ്രതികൾക്ക് വേണ്ടി ലുക്ക് ഔട്ട് നോട്ടീസ് പുറത്തിറക്കും