കണ്ണൂർ: ക്ളാസ് മുറിയിൽ വിദ്യാർഥി പെപ്പർ സ്‌പ്രേ അടിച്ചതിനെ തുടർന്ന് ശ്വാസംമുട്ടൽ അനുഭവപ്പെട്ട 15 വിദ്യാർഥികളെ ആശുപത്രിയിൽ പ്രവേശിപ്പിച്ചു. തായിനേരി എസ്‌എബിടിഎം ഹയർസെക്കണ്ടറി സ്‌കൂളിൽ ഇന്ന് രാവിലെ 9.15നാണ് സംഭവം. സ്‌കൂളിന്റെ ഒന്നാം നിലയിൽ പ്രവർത്തിക്കുന്ന ഒമ്പതാം ക്‌ളാസിലാണ് സംഭവം നടന്നത്.
അധ്യാപിക ക്‌ളാസിൽ എത്തിയപ്പോൾ വല്ലാത്തൊരു ഗന്ധം അനുഭവപ്പെട്ടു. അധ്യാപിക കാര്യം തിരക്കുമ്പോഴേക്കും കുട്ടികളിൽ പലരും നിർത്താതെ ചുമയ്‌ക്കാൻ തുടങ്ങി. സംഭവം അറിഞ്ഞു മറ്റു അധ്യാപകരും ക്ളാസ് മുറിയിലെത്തി. പിന്നാലെ കുട്ടികളെ താഴത്തെ ക്ളാസ് മുറിയിലേക്ക് മാറ്റി. തുടർന്ന് കുട്ടികളുടെ ബാഗ് പരിശോധിച്ചപ്പോഴാണ് ഒരു കുട്ടിയുടെ ബാഗിൽ നിന്ന് പെപ്പർ സ്‌പ്രേ കണ്ടെത്തിയത്.
കുട്ടിയോട് കാര്യം തിരക്കിയപ്പോൾ, സാധാരണ ബോഡി സ്‌പ്രേ ആണെന്ന് കരുതിയാണ് ക്ളാസ് മുറിയിൽ പ്രയോഗിച്ചതെന്നും അറിയാതെ ചെയ്‌തു പോയതാണെന്നാണ് മറുപടി ലഭിച്ചതെന്നും അധ്യാപകർ പറഞ്ഞു. അസ്വസ്‌ഥതകൾ പ്രകടിപ്പിച്ച 15 വിദ്യാർഥികളെ അധ്യാപകരാണ് ആശുപത്രിയിൽ എത്തിച്ചത്. എല്ലാവരുടെയും ആരോഗ്യനില തൃപ്‌തികരമാണെന്നും അധ്യാപകർ അറിയിച്ചു.
Most Read| മന്ത്രിയുമായി ചർച്ച; സമരത്തിൽ നിന്ന് പിൻമാറിയതായി സ്വകാര്യ ബസ് ഉടമകൾ
