കണ്ണൂർ: സംസ്‌ഥാന വ്യാപകമായി നടത്തുന്ന ‘ഓപ്പറേഷൻ ഭ്രഷ്‌ട് നിർമൂലം’ പരിശോധനയുടെ ഭാഗമായി കണ്ണൂർ, കാസർഗോഡ് ജില്ലകളിലെ ചെക്ക്‌പോസ്‌റ്റുകളിൽ മോട്ടോർ വാഹനവകുപ്പ് വിജിലൻസ് പരിശോധന നടത്തി. പരിശോധനയിൽ കണക്കിൾ പെടാത്ത 16,900 രൂപ പിടിച്ചെടുത്തതായി വിജിലൻസ് അധികൃതർ പറഞ്ഞു. ഇന്നലെ രാവിലെ ആറുമുതലാണ് വിജിലൻസ് പരിശോധന നടത്തിയത്.
കണ്ണൂർ കൂട്ടുപുഴ ചെക്ക്‌പോസ്‌റ്റിൽ എത്തുന്ന വാഹനങ്ങളിൽ നിന്ന് അനധികൃതമായി പണം പിരിക്കുന്ന രണ്ടു ഇടനിലക്കാരെയും ഉദ്യോഗസ്‌ഥർ കസ്‌റ്റഡിയിലെടുത്തിട്ടുണ്ട്. ചെറിയ വാഹനങ്ങൾക്ക് രശീതോ, മറ്റ് ചോദ്യങ്ങളോ ഇല്ലാതെ 50 രൂപ കൊടുത്തും, വലിയ വാഹനങ്ങൾ 100 രൂപ കൊടുത്തും പരിശോധനകൾ ഇല്ലാതെ അതിർത്തി കടന്നു പോകുന്നതായി വിജിലൻസ് കണ്ടെത്തി. കൂടാതെ, കണ്ണൂർ കൂട്ടുപുഴ ചെക്ക്‌പോസ്‌റ്റിൽ അനധികൃതമായി 1,600 രൂപ പിരിക്കുന്നതും വിജിലൻസ് സംഘം തടഞ്ഞു.
ദിവസവും നൂറുകണക്കിന് വാഹനങ്ങൾ കടന്നുപോകുന്ന കൂട്ടുപുഴ ചെക്ക്‌പോസ്‌റ്റിൽ കഴിഞ്ഞ മാസം വെറും 25 വാഹനങ്ങളാണ് ഭാര പരിശോധന നടത്തിയതെന്നും കണ്ടെത്തി. അതിൽ രണ്ടെണ്ണത്തിൽ മാത്രമാണ് ഭാരക്കൂടുതൽ കണ്ടെത്തിയതും. എന്നാൽ, ഭാര പരിശോധനാ യന്ത്രം ഇല്ലെന്നാണ് ചെക്ക്‌പോസ്‌റ്റ് ഉദ്യോഗസ്‌ഥരുടെ വാദം. ഇവിടെയുള്ള ക്യാമറയും പ്രവർത്തിക്കുന്നില്ല. കൈക്കൂലിക്കെതിരായ ബോർഡ് ആരും കാണാത്ത സ്‌ഥത്താണുള്ളത്. ഇവയുടെയെല്ലാം വീഡിയോയും വിജിലൻസ് പകർത്തിയിട്ടുണ്ട്.
ചെക്ക്‌പോസ്‌റ്റിലെ ഒരു ഉദ്യോഗസ്‌ഥന്റെ ഫോണിലേക്ക് പണം ആവശ്യപ്പെട്ട് വന്ന വാട്‌സ്ആപ് സന്ദേശത്തിന്റെ അടിസ്‌ഥാനത്തിലാണ്‌ വാഹനങ്ങളിൽ നിന്ന് പണം പിരിക്കുന്ന രണ്ടു ഇടനിലക്കാരെ പിടികൂടാനായത്. വിജിലൻസ് ഡിവൈഎസ്‌പി ബാബു പെരിങ്ങേത്തിന്റെ നേതൃത്വത്തിലുള്ള സംഘമാണ് പരിശോധന നടത്തിയത്. വിഷയത്തിൽ സമഗ്ര അന്വേഷണം നടത്തുമെന്ന് വിജിലൻസ് സംഘം പറഞ്ഞു.
അഭിപ്രായങ്ങളുടെ ആധികാരികത ഉറപ്പിക്കുന്നതിന് വേണ്ടി കൃത്യമായ ഇ-മെയിൽ വിലാസവും ഫോട്ടോയും ഉൾപ്പെടുത്താൻ ശ്രമിക്കുക. രേഖപ്പെടുത്തപ്പെടുന്ന അഭിപ്രായങ്ങളിൽ 'ഏറ്റവും മികച്ചതെന്ന് ഞങ്ങളുടെ എഡിറ്റോറിയൽ ബോർഡിന്' തോന്നുന്നത് പൊതു ശബ്‌ദം എന്ന കോളത്തിലും സാമൂഹിക മാദ്ധ്യമങ്ങളിലും ഉൾപ്പെടുത്തും. ആവശ്യമെങ്കിൽ എഡിറ്റ് ചെയ്യും. ശ്രദ്ധിക്കുക; മലബാർ ന്യൂസ് നടത്തുന്ന അഭിപ്രായ പ്രകടനങ്ങളല്ല ഇവിടെ പോസ്‌റ്റ് ചെയ്യുന്നത്. ഇവയുടെ പൂർണ ഉത്തരവാദിത്തം രചയിതാവിനായിരിക്കും. അധിക്ഷേപങ്ങളും അശ്‌ളീല പദപ്രയോഗങ്ങളും നടത്തുന്നത് ശിക്ഷാർഹമായ കുറ്റമാണ്.
