കൊച്ചി: അതിജീവിതക്ക് തന്റെ മുന്നിലെ തടസങ്ങൾ എല്ലാം നേരിട്ടു കൊണ്ടു സത്യം തെളിയിക്കുക ആ കുറ്റകൃത്യം പോലെ തന്നെ ഭീകരമാണെന്ന് വുമൺ ഇൻ സിനിമ കലക്ടീവ്(ഡബ്ള്യുസിസി). സംഘടന എപ്പോഴും അതിജീവിതക്ക് ഒപ്പമാണെന്ന് ആവർത്തിക്കുന്നുവെന്ന് ഫേസ്ബുക്ക് പോസ്റ്റിൽ ഡബ്ള്യുസിസി വ്യക്തമാക്കി. അതിജീവതയെ മനസിലാക്കുകയും വിശ്വസിക്കുകയും ചെയ്യുന്നതായി സംഘടന പറഞ്ഞു. നടൻ വിജയ് ബാബുവിനു ജാമ്യം ലഭിച്ചതിലുള്ള പ്രതികരണമായാണ് ഫേസ്ബുക്ക് പോസ്റ്റ്.
പുതുമുഖ നടിയെ പീഡിപ്പിച്ച കേസിൽ ഉപാധികളോടെയാണ് വിജയ് ബാബുവിന് ഹൈക്കോടതി ജാമ്യം അനുവദിച്ചത്. 27 മുതൽ ജൂലൈ 3 വരെ രാവിലെ 9 മുതൽ വൈകിട്ട് 5 വരെ ചോദ്യംചെയ്യാം, അറസ്റ്റ് ചെയ്യുകയാണെങ്കിൽ 5 ലക്ഷം രൂപയുടെ ബോണ്ടിലും തുല്യ തുകയ്ക്ക് 2 പേരുടെ ഉറപ്പിലും ജാമ്യത്തിൽ വിട്ടയക്കണം തുടങ്ങിയ വ്യവസ്ഥകളോടെയാണ് ജാമ്യം അനുവദിച്ചത്.
നടിയുമായി ഉഭയസമ്മത പ്രകാരമുള്ള ബന്ധമായിരുന്നെന്നും താൻ നിർമിക്കുന്ന സിനിമയിൽ മറ്റൊരു നടിയെ നായികയാക്കുന്നെന്ന വിവരത്തെ തുടർന്നുള്ള ഗൂഢതന്ത്രമാണ് ആരോപണമെന്നും വിജയ് ബാബു കോടതിയിൽ പറഞ്ഞിരുന്നു. ഹൈക്കോടതി ഉത്തരവിനെതിരെ അപ്പീൽ നൽകുമെന്ന് അതിജീവിതയായ നടിയുടെ അഭിഭാഷകൻ അറിയിച്ചിട്ടുണ്ട്.
Most Read: 3 മാസത്തിൽ താഴെയുള്ള കുട്ടികളെ അഭിനയിപ്പിക്കരുത്; മാര്ഗ നിര്ദ്ദേശങ്ങള് പുറത്ത്