മലപ്പുറം: ജില്ലയിൽ കടലാക്രമണത്തിന് സാധ്യത ഉള്ളതിനാൽ ജാഗ്രതാ നിർദ്ദേശം പുറപ്പെടിച്ച് ഫിഷറീസ് വകുപ്പ്. മൂന്നര മീറ്റർ ഉയരത്തിൽ വരെ തീരത്തേക്ക് തിര ആഞ്ഞടിക്കാൻ സാധ്യത ഉണ്ടെന്ന് അധികൃതർ അറിയിച്ചു. ഇതേ തുടർന്ന് തീരദേശങ്ങളിൽ താമസിക്കുന്നവർ കടുത്ത ജാഗ്രത പാലിക്കണമെന്നും, മൽസ്യ തൊഴിലാളികൾ ഇന്ന് അർധരാത്രി വരെ കടലിൽ പോകരുതെന്നും ഫിഷറീസ് വകുപ്പ് അറിയിച്ചു.
ശക്തമായ മഴയെത്തുടർന്ന് പൊന്നാനി ഉൾപ്പടെയുള്ള ജില്ലയിലെ കടൽ തീരങ്ങളിൽ കടലേറ്റം രൂക്ഷമാണ്. കഴിഞ്ഞ ഏതാനും ദിവസങ്ങളിലായി തീരത്ത് ശക്തമായ കാറ്റും വീശുന്നുണ്ട്. കഴിഞ്ഞ ദിവസം മീൻ പിടിത്തത്തിനിടെ 2 വള്ളങ്ങൾ അപകടത്തിൽപെട്ടിരുന്നു.
വകുപ്പിന്റെ മുന്നറിയിപ്പ് അവഗണിച്ച് ആരും വള്ളങ്ങൾ കടലിൽ ഇറക്കരുതെന്ന് അധികൃതർ അറിയിച്ചു. ഇന്ന് അർധരാത്രി വരെ ജില്ലയിൽ കനത്ത ജാഗ്രത തുടരണമെന്നുമാണ് നിർദ്ദേശം.
Read Also: വടക്കന് കേരളത്തില് മഴ കനക്കും; കണ്ണൂരും കാസർഗോഡും ഇന്ന് യെല്ലോ അലർട്