കരുനാഗപ്പള്ളി: തന്റെ വേറിട്ട ചിത്രരചനയിലൂടെ കയ്യടി നേടുകയാണ് കൊല്ലം കരുനാഗപ്പള്ളി സ്വദേശിയായ അരുണ്‍. പേനയും പെന്‍സിലും ബ്രഷും ഒക്കെ ഉപയോഗിച്ചുള്ള പതിവ് ചിത്രം വരകളില്‍ നിന്നെല്ലാം വ്യത്യസ്തമായി തന്റെ നാക്കിനെ ബ്രഷ് ആക്കി വരകളില്‍ വിസ്മയം തീര്‍ക്കുകയാണ് ഈ പത്തൊന്‍പതുകാരനായ മിടുക്കന്‍. ശാസ്താംകോട്ട ദേവസ്വം ബോര്‍ഡ് കോളജിലെ ബിരുദ വിദ്യാര്‍ത്ഥിയായ അരുണ്‍ രുചിയറിയാന്‍ മാത്രമല്ല ചിത്രങ്ങള്‍ വരക്കാനും നാക്ക് ഉയോഗിക്കാമെന്ന് തെളിയിച്ചിരിക്കുകയാണ്.
ഇതുവരെയായി നൂറോളം ചിത്രങ്ങള്‍ നാക്ക് ഉപയോഗിച്ച് അരുണ്‍ വരച്ചു കഴിഞ്ഞു. അരുണിന്റെ നാക്കില്‍ നിന്നും വിരിയുന്ന മനോഹരമായ ചിത്രങ്ങള്‍ക്ക് ആരാധകര്‍ ഏറെയാണ്. ഇതുവരെ കാണാത്ത വ്യത്യസ്തമായ ഈ ചിത്രരചനക്ക് സമൂഹ മാധ്യമങ്ങളില്‍ ലഭിച്ച മികച്ച പ്രതികരണങ്ങള്‍ തന്നെയാണ് അരുണിനെ വീണ്ടും ഈ രീതി തുടരാന്‍ പ്രേരിപ്പിച്ചത്.
വരകളില്‍ പുത്തന്‍ രീതി കണ്ടെത്തുന്ന അരുണ്‍ ചിത്രരചന പഠിച്ചിട്ടില്ല എന്നതാണ് മറ്റൊരു അത്ഭുതം. എന്തായാലും നാക്കില്‍ ചായം തേച്ചുള്ള തന്റെ ചിത്രരചന ആരോഗ്യത്തിന് അത്ര നല്ലതല്ലെന്നാണ് അരുണ്‍ പറയുന്നത്. തന്റെ രീതി അനുകരിക്കാവുന്ന മാതൃകയല്ലെന്ന് അരുണ്‍ ഓര്‍മ്മിപ്പിക്കുന്നു. എന്നാലും തന്റെ വേറിട്ട ചിത്രരചനയെ കയ്യൊഴിയാന്‍ അരുണ്‍ തയ്യാറായിട്ടില്ല. ഇപ്പോഴും കാഴ്ചക്കാരില്‍ അത്ഭുതം നിറച്ച് തന്റെ വര തുടരുകയാണ് അരുണ്‍.
