നാസിക്: കോവിഡ് പോരാട്ടത്തിൽ പുതുപ്രതീക്ഷയേകി നാസിക്കിലെ ജൽഗോൺ സിറ്റിയിലെ 107 വയസുകാരിക്ക് കോവിഡ് മുക്തി. മഹാരാഷ്ട്രയിലെ ഏറ്റവും പ്രായം കൂടിയ കോവിഡ് മുക്തയും ഇന്ത്യയിൽ തന്നെ കോവിഡ് മാറിയ ഏറ്റവും പ്രായം കൂടിയവരിൽ ഒരാളുമാണ് ഇവർ. ജൽഗോൺ ഗവണ്മെന്റ് മെഡിക്കൽ കോളേജിലായിരുന്നു ഇവർ ചികിത്സ തേടിയത്. തിങ്കളാഴ്ച രാത്രിയോടെ കോവിഡ് നെഗറ്റീവ് ആണെന്ന റിപ്പോർട്ട് വന്നതോടെ ഇവർ ആശുപത്രി വിട്ടു. ആഗസ്റ്റ് ഒന്നിനാണ് ഇവർക്ക് കോവിഡ് ബാധ സ്ഥിരീകരിച്ചത്, രണ്ട് മക്കൾ ഉൾപ്പെടെയുള്ള കുടുംബാംഗങ്ങൾ ഇൻസ്റ്റിറ്റ്യൂഷനൽ ക്വാറന്റൈനിൽ പോകേണ്ടി വന്നതോടെ ഇവരെ ആശുപത്രിയിലേക്ക് മാറ്റുകയായിരുന്നു.
കിടത്തത്തിലായിരുന്നു എങ്കിലും ചികിത്സയുമായി അവർ നല്ല രീതിയിൽ സഹകരിച്ചു എന്നും മാനസികമായി ശക്തയായിരുന്നു എന്നും ആശുപത്രി ഡീൻ ജയപ്രകാശ് രാമാനന്ദ് പറഞ്ഞു.
ആദ്യഘട്ടത്തിൽ ഇവരെ തീവ്രപരിചരണ വിഭാഗത്തിലാണ് പ്രവേശിപ്പിച്ചത്, ഓക്സിജൻ സൗകര്യവും ഏർപ്പെടുത്തിയിരുന്നു. എങ്കിലും വെന്റിലേറ്റർ ഏർപ്പെടുത്തേണ്ടി വന്നിരുന്നില്ല. പ്രായകൂടുതലുണ്ടെങ്കിലും പ്രമേഹമോ, രക്തസമ്മർദമോ പോലെയുള്ള അസുഖങ്ങൾ ഇവരെ അലട്ടിയിരുന്നില്ല.