ശ്രീനഗര്: ജമ്മു-കശ്മീരിലെ ഷോപ്പിയാനില് ഏറ്റുമുട്ടലില് മരിച്ച യുവാക്കള് തീവ്രവാദികള് അല്ലെന്ന് ഇന്ത്യന് സൈന്യം. വിവാദ ഏറ്റുമുട്ടലില് പങ്കെടുത്ത സൈനികര്ക്കെതിരേ കുറ്റം ചുമത്തിയെന്നും, സൈനിക നിയമപ്രകാരം അച്ചടക്ക നടപടി സ്വീകരിക്കുമെന്നും സൈന്യം അറിയിച്ചു.
ജോലി ആവശ്യത്തിനായി ഷോപ്പിയാനില് പോയ യുവാക്കളെ സൈന്യം തീവ്രവാദകളെന്ന പേരില് കൊലപ്പെടുത്തി എന്നാരോപിച്ച് കുടുംബാംഗങ്ങളും പ്രദേശവാസികളും നല്കിയ പരാതിയിലാണ് നടപടി. രജൗരി സ്വദേശികളായ ഇംതിയാസ് അഹമ്മദ്, അബ്രാര് അഹമ്മദ്, മുഹമ്മദ് ഇബ്രാര് എന്നിവരാണ് ജൂലൈയില് ഷോപ്പിയാനില് വച്ച് കൊല്ലപ്പെട്ടത്.
കൊല്ലപ്പെട്ട മൂന്ന് പേരുടെയും കുടുംബം ഇത് വ്യാജ ഏറ്റുമുട്ടലാണെന്ന് അവകാശപ്പെട്ടിരുന്നു. യുവാക്കള്ക്ക് തീവ്രവാദ ബന്ധമില്ലെന്നും ബന്ധുക്കള് പറഞ്ഞിരുന്നു. കുടുംബത്തിന്റെ പരാതിയുടെ അടിസ്ഥാനത്തില് ഏറ്റുമുട്ടലിനെതിരെ അന്തരാഷട്ര അന്വേഷണത്തിന് സൈന്യം ഉത്തരവിട്ടിരുന്നു.