ഇടുക്കി: പ്രണയാഭ്യർഥന നിരസിച്ച പെൺകുട്ടിയുടെ മുടി മുറിച്ച യുവാവ് പോലീസ് പിടിയിൽ. പീരുമേട് കരടിക്കുഴി സ്വദേശി സുനിൽ കുമാറാണ് പിടിയിലായത്. ഇന്നലെയാണ് ഇയാൾ അയൽവാസിയായ പെൺകുട്ടിയുടെ വീട്ടിൽ കയറി വന്ന് ബലമായി മുടി മുറിച്ചത്. പകൽ വീട്ടിൽ ആരുമില്ലാത്ത സമയത്താണ് സുനിൽ 19കാരിയായ പെൺകുട്ടിയുടെ വീട്ടിലെത്തി പ്രണയാഭ്യർഥന നടത്തിയത്.
താല്പര്യമില്ലെന്ന് വിശദമാക്കിയിട്ടും യുവാവ് വീണ്ടും ആവശ്യപ്പെട്ടതോടെ പെണ്കുട്ടി ഭയന്നു. യുവാവ് അടുത്തേക്ക് വന്നതോടെ പെണ്കുട്ടി പ്രതിരോധത്തിനായി കത്രിക എടുക്കുകയായിരുന്നു. ഈ കത്രിക പിടിച്ചുവാങ്ങിയാണ് യുവാവ് ബലമായി പെണ്കുട്ടിയുടെ മുടിമുറിച്ചത്.
ബഹളം വച്ചതോടെ ഇയാൾ പെൺകുട്ടിയെ തള്ളിമറിച്ചിട്ട ശേഷം രക്ഷപെട്ടു. മുമ്പും പലതവണ ഇയാൾ പ്രണയാഭ്യർഥനയുമായി തന്നെ ശല്യപ്പെടുത്തിയിരുന്നതായും അന്നൊക്കെ താല്പര്യമില്ലെന്ന് വിശദമാക്കിയിരുന്നു എന്നും പെൺകുട്ടി പോലീസിൽ മൊഴി നൽകിയിട്ടുണ്ട്.
Most Read: പോലീസ് ഓഫിസർ റാബിയ സെയ്ഫിയുടെ കൊലപാതകം; നിഗൂഢതകൾ ഒഴിയുന്നില്ല
