തിരുവനന്തപുരം: സംസ്ഥാനത്ത് കോവിഡ് തീവ്രവ്യാപനം തുടരുകയാണെന്ന് ആരോഗ്യ മന്ത്രി വീണാ ജോര്ജ്. 20-30 വയസിന് ഇടയിലാണ് രോഗം വ്യാപിക്കുന്നതെന്നും മന്ത്രി വ്യക്തമാക്കി.
പ്രതിദിന കോവിഡ് കേസുകള് അര ലക്ഷം കവിഞ്ഞുവെന്നും ആശുപത്രിയില് പ്രവേശിപ്പിക്കുന്നവരുടെ എണ്ണം കുറവാണെന്നും മന്ത്രി പറഞ്ഞു. ഐസിയും വെന്റിലേറ്ററുമെല്ലാം ആവശ്യത്തിന് ഒഴിവുണ്ട്. ആശങ്കപ്പെടേണ്ട സാഹചര്യമില്ല. മൂന്നു ശതമാനത്തോളം ആളുകള് മാത്രമാണ് ആശുപത്രിയില് പ്രവേശിപ്പിക്കപ്പെടുന്നത്.
പ്രതിരോധത്തിന്റെ ഭാഗമായി കൂടുതല് സംവിധാനങ്ങള് സംസ്ഥാനത്ത് ഏര്പ്പെടുത്തും. എല്ലാ മെഡിക്കല് കോളേജ് ആശുപത്രികളിലും കണ്ട്രോള് റൂം തുറക്കും. ആരോഗ്യ പ്രവര്ത്തകരിലെ രോഗവ്യാപനം വെല്ലുവിളിയാണ്. അത് മറികടക്കാന് കോവിഡ് ബ്രിഗേഡ് പോലെ കൂടുതല് ആരോഗ്യ പ്രവര്ത്തകരെ നിയമിക്കും. 4917 ജീവനക്കാരെയാണ് വിവിധ തലങ്ങളില് നിയമിക്കുക എന്നും മന്ത്രി വ്യക്തമാക്കി.
Read Also: വിദേശ സംഭാവന; എൻജിഒകൾക്ക് തിരിച്ചടി, സുപ്രീം കോടതി ഇടക്കാല ഉത്തരവ് പുറപ്പെടുവിച്ചില്ല
