പുരയിടത്തുനിന്ന് വിളവെടുത്ത 35 കിലോയോളം തൂക്കം വരുന്ന ഭീമൻ കപ്പ കൗതുകമായി. പാലക്കാട് മംഗലംഡാം കടപ്പാറ ചിറയത്ത് ജോസിന്റെ പുരയിടത്തിൽ നിന്നാണ് ഭീമൻ കപ്പ വിളവെടുത്തത്. ഇത് നാട്ടുകാർക്കും വീട്ടുകാർക്കും കൗതുകമായി മാറി.
ഇതുവരെ വിളവെടുത്തവയിൽ നിന്നെല്ലാം 25 മുതൽ 30 കിലോ വരെ കപ്പ കിട്ടിയിരുന്നതായി വീട്ടുകാർ പറഞ്ഞു. നല്ല വിളവുള്ളതുകൊണ്ട് ഒരു മൂടിൽ നിന്ന് വീട്ടാവശ്യത്തിനുള്ള ഒന്നോ രണ്ടോ കപ്പ ഇളക്കിയെടുക്കലാണ് പതിവ്. ഒന്ന് കഴിയുമ്പോൾ അടുത്തതിൽ നിന്ന് മാന്തിയെടുക്കും.
ഇതിനിടെ വീട്ടിലെത്തിയ ബന്ധുക്കൾക്ക് കൂടി കൊടുത്തുവിടാമെന്ന് കരുതി ഒരു മൂട് മൊത്തത്തിൽ ഇളക്കിയപ്പോഴാണ് അസാധാരണ വലിപ്പമുള്ള കപ്പ ശ്രദ്ധയിൽപ്പെട്ടത്. മൂപ്പ് കൂടിയ വേളാങ്കി ഇനത്തിൽപ്പെട്ട കപ്പ മുൻവർഷങ്ങളിൽ ഉണ്ടായിരുന്ന കപ്പത്തണ്ട് മുറിച്ചുനട്ടതാണെന്നും മണ്ണ് നല്ലതുപോലെ ആഴത്തിൽ കൊത്തിയിളക്കി തടമെടുത്ത് നട്ടതല്ലാതെ രാസവളമോ മറ്റോ ചേർത്തിട്ടില്ലെന്നും ജോസ് പറഞ്ഞു.
Most Read| ‘കോയ’ക്ക് പിന്നിലെ വിവരങ്ങളും കൗതുകങ്ങളും അറിയാം
