ഭോപ്പാല്: പൊതുപരിപാടിയില് മാസ്ക് ധരിക്കില്ല എന്ന് മധ്യപ്രദേശ് ആഭ്യന്തര മന്ത്രി നരോദം മിശ്ര. പ്രസ്താവന വിവാദമായതോടെ ഒടുവില് മന്ത്രി തെറ്റ് സമ്മതിച്ചു. കോവിഡ് മാനദണ്ഡങ്ങള് പൂര്ണമായി പാലിക്കുമെന്നും അദ്ദേഹം ഉറപ്പ് നല്കി.
ഇന്നലെ മാദ്ധ്യമങ്ങളുടെ മുമ്പിലാണ് മാസ്ക് ധരിക്കില്ല എന്ന് മന്ത്രി പരാമര്ശിച്ചത്. മാസ്ക് ധരിക്കാതെ എത്തിയ മന്ത്രിയെ മാദ്ധ്യമങ്ങള് ചോദ്യം ചെയ്തപ്പോള് ‘ഒരു പരിപാടിയിലും മാസ്ക് ധരിക്കില്ല, അതില് എന്താണ് തെറ്റ്?’ എന്നായിരുന്നു അദ്ദേഹത്തിന്റെ മറുപടി. ഈ പരാമര്ശം വിവാദമായതോടെയാണ് ഖേദപ്രകടനവുമായി നരോദം മിശ്ര എത്തിയത്.
‘മാസ്കുമായി ബന്ധപ്പെട്ട് ഞാന് നടത്തിയ പരാമര്ശം നിയമലംഘനമാണ്. പ്രധാനമന്ത്രി നരേന്ദ്രമോദിയുടെ നിലപാടിന് വിരുദ്ധമാണ്. ഞാന് എന്റെ തെറ്റ് സമ്മതിക്കുന്നു. പരാമര്ശത്തില് ഖേദം പ്രകടിപ്പിക്കുന്നു. തീര്ച്ചയായും ഞാന് മാസ്ക് ധരിക്കും. എല്ലാവരും മാസ്ക് ധരിക്കാനും സാമൂഹ്യ അകലം പാലിക്കാനും അഭ്യര്ത്ഥിക്കുന്നു.’- മന്ത്രി ട്വിറ്ററില് കുറിച്ചു.