മതിലകം: കളരിപ്പറമ്പില് സാമൂഹ്യവിരുദ്ധരുടെ അക്രമം വര്ധിക്കുന്നു. തെരുവ് വിളക്കിന്റെ ഫ്യൂസ് ഊരിമാറ്റിയതിന് ശേഷം വീട് കയറി അതിക്രമം നടത്തി. രണ്ട് വീട്ടുവളപ്പിലെ വാഴകളും ചെടികളും വെട്ടിനശിപ്പിച്ചു. കളരിപ്പറമ്പ് സ്കൂളിന് പടിഞ്ഞാറ് മണ്ടത്ര മനുരാജ്, സഹോദരന് അനുരാജ് എന്നിവരുടെ വീടുകളിലെ വാഴയും തെങ്ങിന് തൈകളുമാണ് നശിപ്പിച്ചത്.
ശബ്ദം കേട്ട് വീട്ടുകാര് ഉണര്ന്ന് ലൈറ്റിട്ടപ്പോഴേക്കും രണ്ട് പേര് മതില് ചാടി ഓടി രക്ഷപെട്ടു. പാപ്പിനിവട്ടം ബാങ്കിന് വടക്ക് തെക്കൂട്ട് ഷീല ജയദാസിന്റെ വീട്ടിലും സമാന സംഭവം ഉണ്ടായി. ഇവരുടെ വീട്ടിലെ ചെടിച്ചട്ടികള് തല്ലിത്തകര്ത്ത നിലയിലാണ്. കൂടാതെ, ബ്രേക്ക് ദി ചെയിന് ക്യാമ്പയ്ന്റെ ഭാഗമായി വൈഭവ് ഗ്രാമ സേവാ സമിതി റോഡരികില് സ്ഥാപിച്ച ഹാന്ഡ് വാഷിംഗ് ബൂത്തും നശിപ്പിച്ചു. ഇതിന് സമീപം യുവാക്കള് കെട്ടിയുണ്ടാക്കിയ വിശ്രമ കേന്ദ്രത്തിലും സാമൂഹ്യ വിരുദ്ധര് അക്രമം നടത്തി. ഇവിടുത്തെ സോഫയും മറ്റും വലിച്ചുവാരി ഇട്ടിരിക്കുകയാണ്. നാശ നഷ്ടങ്ങള് ഉണ്ടായ വീട്ടുകാര് മതിലകം പോലീസിന് പരാതി നല്കി.