ഐസ്വാള്: അസം-മിസോറാം അതിര്ത്തിയില് സംഘര്ഷം വര്ധിക്കുന്ന സാഹചര്യത്തില് കേന്ദ്ര സര്ക്കാര് ഇടപെടുന്നു. കേന്ദ്ര ആഭ്യന്തര സെക്രട്ടറി അജയ് ഭല്ല ഇരു സംസ്ഥാനങ്ങളിലെയും ചീഫ് സെക്രട്ടറിമാരുടെ യോഗം വിളിച്ചു ചേര്ത്തു.
അസം മുഖ്യമന്ത്രിയും മിസോറാം മുഖ്യമന്ത്രിയും തമ്മില് ടെലിഫോണില് ചര്ച്ച നടത്തി. പ്രധാനമന്ത്രി സ്ഥിതിഗതികള് വിലയിരുത്തി.
164 കിലോമീറ്ററോളം നീളമുള്ള അതിര്ത്തിയില് പല ഭാഗത്തും തര്ക്കങ്ങള് നിലനില്ക്കുന്നുണ്ട്. ഇതിന്റെ ഭാഗമായി മേഖലയില് നിരന്തരം സംഘര്ഷങ്ങള് ഉണ്ടാവുകയും ചെയ്യാറുണ്ട്.
കഴിഞ്ഞ രണ്ട് ദിവസമായി ഇവിടെ കലാപാന്തരീക്ഷം നിലനിന്നിരുന്നു. രണ്ട് വിഭാഗങ്ങള് തമ്മിലുണ്ടായ സംഘര്ഷത്തില് നിരവധി പേര്ക്ക് പരിക്കേറ്റിരുന്നു. കഴിഞ്ഞ കുറച്ചു നാളുകളായി പുകയുന്ന തര്ക്കങ്ങളാണ് വന് പ്രശ്നങ്ങളിലേക്ക് നയിച്ചത്.
അതിര്ത്തിയിലെ ലൈലാപൂര് മേഖലയില് വ്യാപാര സ്ഥാപനങ്ങളും വാഹനങ്ങളും വീടുകളും തകര്ത്തു. ഇവിടെ പല വീടുകളും അഗ്നിക്കിരയാക്കി. മിസോറാം അതിര്ത്തിയില് കോവിഡ് നിയന്ത്രണങ്ങളുടെ ഭാഗമായി സ്ഥാപിച്ച ടെന്ഡുകളെ ചൊല്ലിയാണ് തര്ക്കം ഉടലെടുത്തത്.
ഇത് പിന്നീട് വലിയ സംഘര്ഷത്തിലേക്ക് നയിക്കുക ആയിരുന്നു. കേന്ദ്ര സേനയും, ഇരു സംസ്ഥാനങ്ങളിലെയും പോലീസുകാരും എത്തിയാണ് സ്ഥിതി ശാന്തമാക്കിയത്.
Read Also: ജസ്റ്റിസ് രമണക്ക് എതിരായ ആരോപണം; ബാര് അസോസിയേഷന് രണ്ട് തട്ടില്