തിരുവനന്തപുരം : പതിനാലാം കേരള നിയമസഭയുടെ ഇരുപതാം സമ്മേളനം ആരംഭിച്ചു. സഭയില്‍ സ്പീക്കര്‍ ശ്രീരാമകൃഷ്ണനെ തല്‍സ്ഥാനത്തു നിന്നും നീക്കം ചെയ്യണമെന്ന പ്രതിപക്ഷത്തിന്റെ ആവശ്യത്തെ ചൊല്ലി വാദപ്രതിവാദമുയര്‍ന്നു. സ്പീക്കര്‍ക്കും സ്വര്‍ണ്ണക്കടത്ത് കേസിലെ പ്രതികളുമായി ബന്ധമുണ്ടെന്നാണ് പ്രതിപക്ഷത്തിന്റെ ആരോപണം.
സ്പീക്കറെ നീക്കം ചെയ്യാനുള്ള പ്രമേയ നോട്ടീസ് 14 ദിവസം മുന്‍പ് നല്‍കണമെന്നും, ഭരണഘടന ചട്ടം അനുസരിച്ചു 15 ദിവസം വേണമെന്നും സ്പീക്കര്‍ മറുപടി നല്‍കി. പക്ഷേ 15 ദിവസത്തെ നോട്ടീസ് നല്‍കിയല്ല സഭ ചേര്‍ത്തതെന്ന് പ്രതിപക്ഷ നേതാവ് രമേശ് ചെന്നിത്തലയും ആരോപിച്ചു. അവിശ്വാസ പ്രമേയവും, സ്പീക്കറെ മാറ്റാനുള്ള പ്രമേയവും സഭയില്‍ ഉണ്ടാകുമെന്ന് മുഖ്യമന്ത്രിയെ അറിയിച്ചതാണെന്നും പ്രതിപക്ഷ നേതാവ് പറഞ്ഞു. ഭരണഘടനയാണ് പ്രധാനമെന്നും, ചട്ടം മാറ്റാന്‍ തനിക്ക് സാധിക്കില്ല എന്നും സ്പീക്കര്‍ വ്യക്തമാക്കി.
