പാലക്കാട്: കൂമ്പാച്ചി മലയിലേക്ക് കയറുന്നവർക്ക് എതിരെ കേസെടുക്കാൻ പാലക്കാട് ജില്ലാ കളക്‌ടർ മൃൺമയി ജോഷി നിർദ്ദേശം നൽകി. നിയമം ലംഘിക്കുന്നവർക്ക് പിഴ ചുമത്താനാണ് നിർദ്ദേശം. അപകട മേഖലയിലേക്ക് ആളുകൾ കയറുന്നത് നിയന്ത്രിക്കാൻ സുരക്ഷാ സംവിധാനം ഒരുക്കും. ബാബു എന്ന 24 കാരൻ കൂമ്പാച്ചി മലയിൽ കയറി കുടുങ്ങിയതിന്റെ പശ്‌ചാത്തലത്തിലാണ്‌ നടപടി.
സംഭവത്തിൽ ബാബുവിനെതിരെയും വനംവകുപ്പ് കേസ് എടുത്തിരുന്നു. മേഖലയിൽ പോലീസ്, വനംവകുപ്പ് ഉദ്യോഗസ്‌ഥരുടെ പട്രോളിങ്ങിന് സഹായം നൽകാൻ സിവിൽ ഡിഫൻസ് വളണ്ടിയർമാരെ ഉപയോഗിക്കും. സ്‌ഥലത്ത്‌ അപകട സാധ്യത ചൂണ്ടിക്കാട്ടുന്ന മുന്നറിയിപ്പ് ബോർഡുകൾ സ്‌ഥാപിക്കാനും തീരുമാനായി. ജില്ലാ കളക്‌ടറുടെ നേതൃത്വത്തിൽ ചേർന്ന അവലോകന യോഗത്തിലാണ് തീരുമാനം.
അതേസമയം, ചേറാട് കൂമ്പാച്ചി മലയില്‍ കുടുങ്ങിയ ബാബുവിനെ രക്ഷപ്പെടുത്തുന്നതിൽ വീഴ്‌ച വരുത്തിയ സാഹചര്യത്തിൽ പാലക്കാട് ജില്ലാ ഫയർ ഓഫിസറെ സ്‌ഥലം മാറ്റി. ജില്ലാ ഫയർ ഓഫിസറായ വികെ ഋതീജിനെ വിയ്യൂരിലേക്കാണ് സ്‌ഥലം മാറ്റിയത്. രക്ഷാപ്രവർത്തനത്തിൽ ഏകോപനം ഉണ്ടായില്ലെന്ന് ചൂണ്ടിക്കാട്ടിയാണ് നടപടി. മലപ്പുറം ജില്ലാ ഫയർ ഓഫിസറായ ടി അനൂപിനെ പാലക്കാട്ടേക്ക് മാറ്റി നിയമിച്ചു.
Most Read: ‘ഇടതുമുന്നണിയെ തകർക്കാൻ തന്നെ ഉപയോഗിക്കരുത്’; കാനത്തിന് ഗവർണറുടെ മറുപടി
