പ്രഖ്യാപന സമയം മുതൽ പ്രേക്ഷക ശ്രദ്ധ നേടിയ ചിത്രമാണ് മമ്മൂട്ടി-കെ മധു-എസ്എൻ സ്വാമി കൂട്ടുകെട്ടിൽ ഒരുങ്ങുന്ന ‘സിബിഐ 5′. സിനിമയുമായി ബന്ധപ്പെട്ട് വരുന്ന വാർത്തകൾ ഏറെ കൗതുകത്തോടെയാണ് ആരാധകർ ഏറ്റെടുക്കുന്നത്. നീണ്ട നാളത്തെ കാത്തിരിപ്പിന് ഒടുവിൽ ഇന്ന് ചിത്രത്തിന്റെ പൂജയും സ്വിച്ചോണ് കര്മ്മവും നടന്നു. സംവിധായകൻ കെ മധു, തിരക്കഥാകൃത്ത് എസ്എൻ സ്വാമി, നിർമാതാവ് സ്വർഗചിത്ര അപ്പച്ചൻ എന്നിവർ ചടങ്ങിൽ സന്നിഹിതരായി.
പൂജയുടെ ചിത്രങ്ങൾ മമ്മൂട്ടിയും പങ്കുവച്ചിട്ടുണ്ട്. പിന്നാലെ നിരവധി പേരാണ് ആശംസകളുമായി രംഗത്ത് വന്നത്. ഡിസംബര് പകുതിയോടെയാവും മമ്മൂട്ടി ചിത്രത്തിൽ ജോയിന് ചെയ്യുകയെന്നാണ് വിവരം. നിലവില് ലിജോ ജോസ് പെല്ലിശ്ശേരിയുടെ പുതിയ ചിത്രത്തില് അഭിനയിച്ചു കൊണ്ടിരിക്കുകയാണ് അദ്ദേഹം. പൂര്ണമായും തമിഴ്നാട്ടില് ചിത്രീകരിക്കുന്ന ഈ ചിത്രത്തിന്റെ പഴനി ഷെഡ്യൂള് പുരോഗമിക്കുകയാണ്.
സേതുരാമയ്യരായി മമ്മൂട്ടി വീണ്ടുമെത്തുമ്പോള് പല മാറ്റങ്ങളും ചിത്രത്തിനുണ്ട്. മമ്മൂട്ടിക്കൊപ്പം വനിതാ അന്വേഷണ ഉദ്യോഗസ്ഥരും ഇക്കുറി ഉണ്ടാവും. ചിത്രത്തിലെ ഐക്കോണിക് തീം മ്യൂസിക് ഒരുക്കുന്നത് ജാക്സ് ബിജോയ് ആണ്. സിബിഐ സിരീസിലെ മറ്റ് നാല് സിനിമകൾക്കും പശ്ചാത്തല സംഗീതം ഒരുക്കിയത് സംഗീത സംവിധായകൻ ശ്യാം ആയിരുന്നു.
1988ലാണ് സിബിഐ സീരീസിലെ ആദ്യ ചിത്രമായ ‘ഒരു സിബിഐ ഡയറികുറിപ്പ്’ പുറത്തിറങ്ങിയത്. പിന്നീട് ജാഗ്രത, സേതുരാമയ്യര് സിബിഐ, നേരറിയാന് സിബിഐ എന്നീ ചിത്രങ്ങളും പുറത്ത് വന്നു. പുതിയ ചിത്രത്തിൽ ആശാ ശരത്താണ് മമ്മൂട്ടിയുടെ നായികയായി എത്തുന്നത്. മുകേഷ്, രണ്ജി പണിക്കര്, സൗബിന് ഷാഹിര്, സായ് കുമാര് എന്നിവര്ക്കൊപ്പം ഒട്ടേറെ താരങ്ങള് ചിത്രത്തിന്റെ ഭാഗമാകും.
Read Also: ബിറ്റ്കോയിൻ കറൻസിയായി അംഗീകരിച്ചിട്ടില്ല; നിർമല സീതാരാമൻ