വയനാട്: ജില്ലയിലെ കോവിഡ് ബാധിതരുടെ എണ്ണം ഒരു ലക്ഷം പിന്നിട്ടു. കഴിഞ്ഞ ദിവസം 1,003 പേർക്ക് കൂടി രോഗബാധ ഉണ്ടായതോടെയാണ് നിലവിൽ ജില്ലയിലെ ആകെ രോഗബാധിതർ ഒരു ലക്ഷം കവിഞ്ഞത്. നിലവിൽ ആയിരത്തിന് മുകളിലാണ് ജില്ലയിലെ പ്രതിദിന കോവിഡ് പോസിറ്റീവ് കേസുകൾ. ഈ സാഹചര്യത്തിൽ ജില്ലയിൽ നിലവിൽ പതിനായിരത്തിന് മുകളിൽ ആളുകൾ രോഗബാധിതരായി ചികിൽസയിൽ കഴിയുന്നുണ്ട്.
കഴിഞ്ഞ വർഷം മാർച്ച് 26ആം തീയതിയാണ് ജില്ലയിൽ ആദ്യത്തെ കോവിഡ് കേസ് സ്ഥിരീകരിക്കുന്നത്. തുടർന്ന് ഇതുവരെ രോഗബാധിതരായ ആകെ ആളുകളിൽ 89,173 പേരും രോഗമുക്തരായി. കൂടാതെ രോഗബാധിതരുമായി സമ്പർക്കത്തിൽ ഉണ്ടായിരുന്ന 25,000 പേർ നിലവിൽ ജില്ലയിൽ നിരീക്ഷണത്തിൽ കഴിയുന്നുണ്ട്. രണ്ടാം തരംഗത്തിലാണ് ജില്ലയിൽ ഏറ്റവും കൂടുതൽ ആളുകൾക്ക് രോഗബാധ ഉണ്ടായത്.
തദ്ദേശ സ്ഥാപനങ്ങളുടെ നേതൃത്വത്തിൽ ജില്ലയിലെ പ്രതിരോധ പ്രവർത്തനങ്ങൾ സജീവമായി നടക്കുന്നുണ്ടെങ്കിലും പ്രതിദിന രോഗബാധിതരുടെ എണ്ണത്തിൽ കാര്യമായ കുറവ് ഉണ്ടായിട്ടില്ല. കൂടാതെ ജില്ലയിലെ 14 തദ്ദേശ സ്ഥാപനങ്ങളിലെ 50ലേറെ വാർഡുകളും രോഗവ്യാപനത്തെ തുടർന്ന് അടച്ചിട്ടിരിക്കുകയാണ്.
Read also: കെപിസിസി നേതൃത്വത്തിന് പൂർണ പിന്തുണ പ്രഖ്യാപിച്ച് എകെ ആന്റണി