ന്യൂഡല്‍ഹി: രാജ്യത്തെ കോവിഡ് ബാധിതരുടെ എണ്ണം 30 ലക്ഷം കടന്നു. 24 മണിക്കൂറിനിടെ 69,239 പേര്‍ക്ക് ആണ് രോഗബാധ സ്ഥിരീകരിച്ചത്. കേന്ദ്രസര്‍ക്കാര്‍ പുറത്ത് വിട്ട കണക്കുകള്‍ പ്രകാരം ഇതുവരെ 30,44,490 പേര്‍ക്കാണ് രാജ്യത്ത് കോവിഡ് സ്ഥിരീകരിച്ചത്. 912 മരണങ്ങള്‍ കഴിഞ്ഞ ദിവസം മാത്രം റിപ്പോര്‍ട്ട് ചെയ്തു.
നിലവില്‍ 7,07,668 പേരാണ് രാജ്യത്ത് കോവിഡ് ബാധിച്ച് ചികിത്സയിലുള്ളത്. 22,80,566 പേര്‍ രോഗമുക്തി നേടി. ഇതുവരെ 56,706 പേരാണ് രാജ്യത്ത് കോവിഡ് ബാധിച്ച് മരിച്ചത്.
ലോകത്തെ മറ്റു രാജ്യങ്ങളെ അപേക്ഷിച്ച് വളരെ വേഗത്തിലാണ് ഇന്ത്യയില്‍ രോഗം വ്യാപിക്കുന്നതെന്നാണ് കണക്കുകള്‍ വ്യക്തമാക്കുന്നത്. പതിനാറ് ദിവസത്തിനിടെ ഇരുപത് ലക്ഷത്തില്‍ നിന്ന് മുപ്പത് ലക്ഷത്തിലേക്ക് രോഗികളുടെ എണ്ണം കുത്തനെ കൂടി. അതേസമയം രോഗബാധിതരുടെ പട്ടികയില്‍ ഒന്നാമതുള്ള അമേരിക്കയില്‍ ഇത് 28 ഉം ബ്രസീലില്‍ 23ഉം ദിവസങ്ങള്‍ കൊണ്ടായിരുന്നു രോഗബാധിതരുടെ എണ്ണത്തില്‍ ഇത്രയേറെ വര്‍ദ്ധനവുണ്ടായത്.
മഹാരാഷ്ട്രയില്‍ ഇന്നലെ മാത്രം 14,492 പേര്‍ രോഗബാധിതരായി. ദക്ഷിണേന്ത്യന്‍ സംസ്ഥാനങ്ങളിലും പ്രതിദിന രോഗ ബാധ ഉയര്‍ന്നു തന്നെയാണ്. ആന്ധ്രയില്‍ 10,276 പേര്‍ക്ക് കോവിഡ് സ്ഥിരീകരിച്ചു. തമിഴ്നാട്ടില്‍ 5980 പേര്‍ക്കും , കര്‍ണാടകയില്‍ 7330 പേര്‍ക്കും ഇന്നലെ രോഗബാധ സ്ഥിരീകരിച്ചു.
