തിരുവനന്തപുരം: കേരള കോൺഗ്രസ് ജോസ് കെ മാണി വിഭാഗത്തെ ഇടതുമുന്നണിയിൽ ചേർക്കുന്നതിനെ സ്വാഗതം ചെയ്‌ത്‌ സിപിഐ. ജോസ് കെ മാണി പക്ഷത്തിന്റെ വരവിനെ എതിർക്കേണ്ടതില്ലെന്ന നിലപാടാണ് ഇന്ന് ചേർന്ന എക്‌സിക്യൂട്ടീവ് യോഗം സ്വീകരിച്ചത്. ജോസിനെ സ്വീകരിക്കാൻ സിപിഐ നേതൃത്വം തയ്യാറായെങ്കിലും പാർട്ടിക്കുള്ളിൽ ഇത് സംബന്ധിച്ച് കൃത്യമായ ധാരണ ഉണ്ടായിരുന്നില്ല.
പെട്ടന്ന് ജോസ് കെ മാണിയെ എൽഡിഎഫിലേക്ക് എടുക്കേണ്ടതില്ലെന്നും തദ്ദേശ തെര‍ഞ്ഞെടുപ്പിൽ സഹകരിപ്പിച്ച ശേഷം അവരുടെ ജനസ്വാധീനം കൂടി പരിശോധിച്ച് മുന്നണി പ്രവേശനം അനുവദിക്കാമെന്നുള്ള അഭിപ്രായം സിപിഐ നേതൃത്വത്തിൽ ഒരു വിഭാഗത്തിന് ഉണ്ടായിരുന്നു. എന്നാൽ ഇന്ന് ചേർന്ന സിപിഐ എക്‌സിക്യൂട്ടീവിൽ ജോസ് വിഭാഗത്തിന്റെ വരവിനെ എതിർക്കേണ്ടെന്ന അഭിപ്രായമാണ് ഉയർന്നത്.
ജോസ് വിഭാഗത്തിന്റെ നിലപാട് മാറ്റം സ്വാഗതാർഹമാണെന്ന് എക്‌സിക്യൂട്ടീവ് വിലയിരുത്തി. അടുത്ത എൽഡിഎഫ് യോഗം ജോസ് കെ മാണിയുടെ മുന്നണി പ്രവേശനം ചർച്ച ചെയ്യുമ്പോൾ എതിർക്കേണ്ടതില്ലെന്നും ഇക്കാര്യത്തിൽ പൊതുനിലപാടിനൊപ്പം നിൽക്കാനും സിപിഐയിൽ ധാരണയായിട്ടുണ്ട്.
Related News: ജോസ് കെ മാണിയുടെ വരവ്; സിപിഐ സംസ്‌ഥാന എക്‌സിക്യൂട്ടീവ് യോഗം ഇന്ന്
ഇടതു മുന്നണിയിൽ രണ്ടാമത്തെ കക്ഷിയായ സിപിഐ കൂടി സ്വാഗതം ചെയ്യുന്നതോടെ ജോസ് കെ മാണി വിഭാഗത്തിന്റെ എൽഡിഎഫ് പ്രവേശനത്തിന് ഇനിയൊരു ഔദ്യോഗിക പ്രഖ്യാപനം മാത്രമേ ബാക്കിയുള്ളൂ.
