ബാലുശ്ശേരി: ഉണ്ണികുളത്ത് ആറ് വയസുകാരി നേപ്പാളി ബാലികയെ പീഡിപ്പിച്ച പ്രതി രതീഷ് ആത്‌മഹത്യക്ക് ശ്രമിച്ചു. പോലീസ് സ്‌റ്റേഷന്റെ മുകൾ നിലയിൽ നിന്ന് താഴേക്ക് ചാടിയാണ് പ്രതി ആത്‌മഹത്യക്ക് ശ്രമിച്ചത്. ഇയാളെ മെഡിക്കൽ കോളേജ് ആശുപത്രിയിൽ പ്രവേശിപ്പിച്ചിട്ടുണ്ട്. ഇന്നലെ രാത്രി 11 മണിയോടെയായിരുന്നു സംഭവം. റൂറൽ എസ്‌പി പിഎ ശ്രീനിവാസൻ സ്‌റ്റേഷനിൽ ഇരിക്കെയാണ് പ്രതിയുടെ ആത്‌മഹത്യാ ശ്രമം.
അതേസമയം, പീഡനത്തിനിരയായ കുട്ടിയെ സംസ്‌ഥാന ബാലാവകാശ കമ്മീഷൻ ഇന്ന് സന്ദർശിക്കും. രാവിലെ 11 മണിയോടെ കമ്മീഷൻ അംഗങ്ങളായ കെ നസീർ ബി ബബിത എന്നിവർ കോവിഡ് പ്രോട്ടോക്കോൾ പാലിച്ച് കോഴിക്കോട് മെഡിക്കൽ കോളേജിലെത്തി കുട്ടിയെ കാണും. സംഭവത്തിൽ ബാലാവകാശ കമ്മീഷൻ സ്വമേധയാ കേസെടുത്ത് ഉത്തരവാദിത്തപ്പെട്ടവർക്ക് നോട്ടീസ് അയച്ചിരുന്നു.
Also Read: ആറ് വയസുകാരിയെ പീഡിപ്പിച്ച സംഭവം; പ്രതി അറസ്‌റ്റിൽ
പീഡനത്തിനിരയായ കുട്ടിക്ക് സ്വകാര്യ ഭാഗത്ത് മുറിവടക്കം ഗുരുതരമായ പരിക്കുകളാണുള്ളത്. കുട്ടി ഇപ്പോഴും അബോധാവസ്‌ഥയിലായതിനാൽ പോലീസിന് ഇതുവരെ മൊഴിയെടുക്കാൻ സാധിച്ചിട്ടില്ല. സംഭവത്തിൽ പെൺകുട്ടിയുടെ അച്ഛന്റെയും കൂട്ടുകാരന്റെയും മൊഴി രേഖപ്പെടുത്തിയിട്ടുണ്ട്. ഉണ്ണികുളം പഞ്ചായത്തിലെ വള്ളിയോത്തെ കരിങ്കൽ ക്വാറിയിൽ പണിയെടുക്കുന്നവരാണ് പെൺകുട്ടിയുടെ മാതാപിതാക്കൾ.
