ന്യൂഡെൽഹി: നടപ്പ് സാമ്പത്തിക വർഷത്തിലെ സാമ്പത്തിക സർവേ റിപ്പോർട് കേന്ദ്രമന്ത്രി നിർമല സീതാരാമൻ പാർലമെന്റിൽ വെച്ചു. കേന്ദ്ര ബജറ്റ് 2022ന് മുന്നോടിയായാണ് സാമ്പത്തിക സർവേ ഫലം പുറത്തുവിട്ടത്. നടപ്പ് സാമ്പത്തിക വർഷത്തിൽ 9.2 ശതമാനം ജിഡിപി വളർച്ച നേടാനാവുമെന്നാണ് റിപ്പോർട്ടിൽ പറയുന്നത്.
ഈ സാമ്പത്തിക വർഷത്തിൽ കാർഷികോൽപാദന രംഗത്ത് 3.9 ശതമാനം വളർച്ച നേടുമെന്ന് സാമ്പത്തിക സർവേ ഫലം പറയുന്നുണ്ട്. വ്യാവസായിക രംഗത്ത് 11.8 ശതമാനം വളർച്ചയാണ് സർവേ പ്രതീക്ഷിക്കുന്നത്. 2022-23 സാമ്പത്തിക വർഷത്തിൽ എട്ട് മുതൽ എട്ടര ശതമാനം വരെ വളർച്ച നേടാനാകുമെന്നും റിപ്പോർട് വ്യക്തമാക്കുന്നുണ്ട്.
പ്രതിസന്ധിയെ നേരിടാൻ ഇന്ത്യൻ സമ്പദ് വ്യവസ്ഥയ്ക്ക് കരുത്തുണ്ടെന്നാണ് എല്ലാ സൂചകങ്ങളും നൽകുന്ന വിവരമെന്ന് റിപ്പോർട് പറയുന്നു. മികച്ച രീതിയിലുള്ള വാക്സിൻ വിതരണം, മറ്റ് വിതരണ മേഖലകളിലെ പരിഷ്കാരങ്ങൾ, കടുത്ത നിയന്ത്രണങ്ങൾ എടുത്ത് കളഞ്ഞത്, കയറ്റുമതിയിലെ വർധനവ് എന്നിവയെല്ലാം വളർച്ചയെ സഹായിക്കുന്ന ഘടകങ്ങളാണെന്ന് റിപ്പോർട് ചൂണ്ടികാണിക്കുന്നു.
Read Also: ‘എൽടിടിഇ’ തിരിച്ചുവരവിന് ശ്രമിക്കുന്നതായി റിപ്പോർട്; ജാഗ്രതയോടെ തമിഴ്നാട്