ന്യൂഡെൽഹി: കേന്ദ്ര സർക്കാർ പാർലമെന്റിനെ യുദ്ധക്കളത്തിന് സമാനമാക്കിയെന്ന് രാജ്യസഭ എംപി എളമരം കരീം. കേന്ദ്ര സർക്കാർ പാർലമെന്ററി മര്യാദ മുഴുവൻ ലംഘിച്ചെന്നും നടപടികൾ തമാശയായാണ് കാണുന്നതെന്നും എളമരം കരീം കുറ്റപ്പെടുത്തി. പുറമെ നിന്നും സുരക്ഷാ ഉദ്യോഗസ്‌ഥരുടെ വേഷം ധരിച്ചെത്തിയവർ വനിതകൾ അടക്കമുള്ള എംപിമാരെ കയ്യേറ്റം ചെയ്യുകയായിരുന്നു. ജനങ്ങളിൽ നിന്ന് മറച്ചുവെക്കാനാണ് പ്രതിപക്ഷ എംപിമാർക്കെതിരെ നടപടിക്ക് ശ്രമിക്കുന്നത്. ഇക്കാര്യത്തിലുള്ള പ്രതിഷേധം പ്രതിപക്ഷം രേഖപ്പെടുത്തിയെന്നും എളമരം കരീം പറഞ്ഞു.
അതേസമയം, ബുധനാഴ്‌ച രാജ്യസഭയിൽ ഉണ്ടായ നാടകീയ സംഭവങ്ങളിൽ നടപടി സ്വീകരിക്കുന്ന വിഷയത്തിൽ ഉപരാഷ്‌ട്രപതി വെങ്കയ്യ നായിഡു ഉന്നത ഉദ്യോഗസ്‌ഥരുമായി ചർച്ച നടത്തി. പ്രതിപക്ഷ അംഗങ്ങൾക്ക് എതിരെ ശക്‌തമായ നടപടി വേണമെന്ന ഭരണ പക്ഷത്തിന്റെ ആവശ്യം പരിഗണിച്ചാണ് ചർച്ച. ചട്ടലംഘനം നടത്തിയ എംപിമാരുടെ പേരു വിവരങ്ങൾ ഇതിനകം രാജ്യസഭ സെക്രട്ടേറിയറ്റ് ചെയർമാന് കൈമാറിയിട്ടുണ്ട്. കേരളത്തിൽ നിന്നുള്ള എളമരം കരിം, വി ശിവദാസൻ, ബിനോയ് വിശ്വം എന്നിവരുടെ പേരുകളും അച്ചടക്കം ലംഘിച്ച എംപിമാരുടെ പട്ടികയിൽ ഉണ്ട്.
Read also: പിഎസ്‌സി ലിസ്‌റ്റ്‌ നിലനിൽക്കെ പിആർഡിയിൽ പിൻവാതിൽ നിയമനം; മുഖ്യമന്ത്രിക്ക് പരാതി
