ന്യൂ ഡെൽഹി: സിബിഐ മുൻ ഡയറക്റ്റർ അശ്വനി കുമാറിനെ മരിച്ച നിലയിൽ കണ്ടെത്തി. 69 വയസായിരുന്നു. ബുധനാഴ്ച ഷിംലയിലെ വസതിയിലാണ് അദ്ദേഹത്തെ തുങ്ങി മരിച്ച നിലയിൽ കണ്ടെത്തിയത്. ആത്മഹത്യ ആണെന്നാണ് പ്രാഥമിക നിഗമനം. ഏറെ നാളായി മാനസിക സമ്മർദ്ദത്തിലായിരുന്നു അശ്വനി കുമാർ എന്ന് റിപ്പോർട്ടുകളുണ്ട്.
നാഗാലാന്റിലും മണിപ്പൂരിലും ഗവർണറായി സേവനമനുഷ്ഠിച്ചിട്ടുണ്ട്. 2006 ഓഗസ്റ്റ് മുതൽ 2008 ജൂലൈ വരെ ഹിമാചൽ പ്രദേശിലെ പോലീസ് മേധാവിയായിരുന്നു. 2008 ഓഗസ്റ്റ് മുതൽ 2010 നവംബർ വരെ അദ്ദേഹം സിബിഐ ഡയറക്റ്ററായി സേവനമനുഷ്ഠിച്ചു. ഞെട്ടിക്കുന്ന സംഭവമാണ് ഇതെന്ന് ഷിംല പോലീസ് മേധാവി മോഹിത് ചൗള പ്രതികരിച്ചു.