മലപ്പുറം: ഭാരതപ്പുഴയിൽ നിന്നും നിരവധി തവണ അനധികൃതമായി മണൽ കടത്തിയ സംഭവത്തിൽ 4 പേരെ പോലീസ് അറസ്റ്റ് ചെയ്തു. തവനൂർ സ്വദേശികളായ മച്ചിങ്ങൽ യാഹു(34), കുറ്റിയാട്ടിൽ പറമ്പിൽ മുഹമ്മദ് മുസ്തഫ(24), പറപ്പൂർ വളപ്പിൽ ഹനീഫ(41), അതളൂർ സ്വദേശി തുമ്പിൽ റിസ്വാൻ(42) എന്നിവരെയാണ് പോലീസ് അറസ്റ്റ് ചെയ്തത്.
ഭാരതപ്പുഴയുടെ വിവിധ ഭാഗങ്ങളിൽ നിന്നും മുൻപ് മണൽ കടത്തിയ സംഭവത്തിലെ പ്രതികളാണ് നിലവിൽ അറസ്റ്റിലായതെന്ന് പോലീസ് വ്യക്തമാക്കി. മണൽ കടത്താനായി പ്രതികൾ ഉപയോഗിച്ചിരുന്ന വാഹനങ്ങൾ നേരത്തെ പിടികൂടിയെങ്കിലും പ്രതികൾ ഓടി രക്ഷപെടുകയായിരുന്നു. തുടർന്ന് പ്രതികൾക്കായി നടത്തിയ തിരച്ചിലിലാണ് ഇവർ അറസ്റ്റിലായത്.
സിഐ ശശീന്ദ്രൻ മേലയിലിന്റെ നേതൃത്വത്തിലുള്ള അന്വേഷണ സംഘമാണ് പ്രതികളെ പിടികൂടിയത്. ഇവരെ നിലവിൽ കോടതിയിൽ ഹാജരാക്കിയ ശേഷം റിമാൻഡ് ചെയ്തു. കൂടാതെ ഭാരതപ്പുഴയിൽനിന്ന് മണൽ വാരുന്നവർക്കെതിരെ മോഷണക്കുറ്റം അടക്കമുള്ളവ ചുമത്തി കേസെടുക്കുമെന്ന് പോലീസ് അറിയിച്ചു.
Read also: കണ്ണൂർ ജില്ലാ ആയുർവേദ ആശുപത്രിയിൽ നവീകരിച്ച ഒപി പ്രവർത്തന സജ്ജം