കൊച്ചി: രണ്ടില ചിഹ്നം ജോസ് കെ മാണി വിഭാഗത്തിന് നൽകിയ തെരഞ്ഞെടുപ്പ് കമ്മീഷൻ നടപടി സ്റ്റേ ചെയ്ത് ഹൈക്കോടതി. പി ജെ ജോസഫ് നൽകിയ ഹരജിയിലാണ് കോടതി നടപടി. ഒരു മാസത്തേക്കാണ് സ്റ്റേ ചെയ്തത്. കേസ് അടുത്ത മാസം ഒന്നിന് വീണ്ടും പരിഗണിക്കും.
വസ്തുതകളും തെളിവുകളും പരിശോധിക്കാതെയാണ് തെരഞ്ഞെടുപ്പ് കമ്മീഷൻ ചിഹ്നം ജോസ് കെ മാണി വിഭാഗത്തിന് നൽകിയത് എന്നാണ് പി ജെ ജോസഫ് വാദിച്ചത്.
അതേസമയം, ഹൈക്കോടതി ഉത്തരവിനു പിന്നാലെ പ്രതികരണവുമായി പിജെ ജോസഫ് രംഗത്തെത്തി. സത്യവും നീതിയും ജയിക്കുമെന്നും ദൈവം തങ്ങൾക്ക് ഒപ്പമുണ്ടെന്നും അദ്ദേഹം മാദ്ധ്യമപ്രവർത്തകരോട് പറഞ്ഞു. അന്തിമ വിധി അനുകൂലമാകും. കോടതിയലക്ഷ്യത്തിന് ജോസ് കെ മാണി ശിക്ഷിക്കപ്പെടും. ജോസ് വിഭാഗം വട്ടപൂജ്യമാകും. മുഖ്യമന്ത്രിക്ക് ഒരു ദിവസം കൂടി കാത്തിരിക്കാമായിരുന്നു, അദ്ദേഹത്തിന്റെ തീരുമാനത്തിന് ഒരു ദിവസത്തെ ആയുസ് മാത്രമേ ഉണ്ടായുള്ളൂവെന്നും പിജെ ജോസഫ് പറഞ്ഞു.
