ന്യൂഡെൽഹി : രാജ്യത്ത് തുടർച്ചയായി ഉയരുന്ന ഇന്ധനവിലയെ തുടർന്ന് മിക്ക സംസ്‌ഥാനങ്ങളിലും വില 100 രൂപ കടന്നിരുന്നു. ഇപ്പോഴിതാ രാജസ്‌ഥാനത്തിൽ പെട്രോൾ വില 110 രൂപയും കടന്ന് ഉയരുകയാണ്. ഹനുമാന്‍ഗഢ് ജില്ലയിലാണ് പ്രീമിയം പെട്രോള്‍ ലിറ്ററിന് 112 രൂപ 11 പൈസയിലേക്കെത്തിയത്.
രാജസ്‌ഥാനിലെ ശ്രീഗംഗനഗറില്‍ പ്രീമിയം പെട്രോളിന് 112 രൂപ 54 പൈസയും സാധാരണ പെട്രോളിന് 109 രൂപ 49 പൈസയുമാണ് വില. പെട്രോൾ വിലക്കൊപ്പം തന്നെ ഇവിടെ ഡീസൽ വിലയും 100 രൂപ കടന്ന് കുതിക്കുകയാണ്. ഡീസലിന് 101 രൂപ 96 പൈസയാണ് ഇവിടെ നിലവിലെ വില.
അതേസമയം കേരളത്തിൽ കൊച്ചിയിലെ ഇന്നത്തെ പെട്രോള്‍ വില 98 രൂപ 56 പൈസയായും, ഡീസൽ വില 94 രൂപ 68 പൈസയായും ഉയർന്നു. തിരുവനന്തപുരം ജില്ലയിൽ ഇതിനോടകം തന്നെ പെട്രോൾ വില 100 കടന്നിട്ടുണ്ട്. രാജ്യത്ത് ഈ മാസം 27ആം തീയതി വരെ 15 തവണയാണ് ഇന്ധനവില വർധിപ്പിച്ചത്.
Read also : മരംകൊള്ള സിബിഐ അന്വേഷിക്കണം; മുഖ്യമന്ത്രിക്ക് കത്തയച്ച് പരിസ്‌ഥിതി സംഘടനകൾ
