ശ്രീനഗർ: ജമ്മു-കശ്മീരിലുണ്ടായ പാക് ഷെല്ലാക്രമണത്തിൽ മലയാളി ജവാൻ വീരമൃത്യു വരിച്ചു. കൊല്ലം അഞ്ചൽ സ്വദേശി അനീഷ് തോമസ് (36) ആണ് വീരമൃത്യു വരിച്ചത്. ജമ്മു കശ്മീരിലെ അതിർത്തി പ്രദേശമായ നൗഷാരാ സെക്ടറിലെ സുന്ദർബെനിയിലാണ് ഷെല്ലാക്രമണം ഉണ്ടായത്.
ഇന്നലെ ഉച്ചക്കായിരുന്നു സംഭവം. ഇന്ന് രാവിലെയാണ് കരസേന മരണവിവരം ഔദ്യോഗികമായി കുടുംബത്തെ അറിയിച്ചത്. പോസ്റ്റ്മോർട്ടത്തിനുശേഷം ഡൽഹിയിലേക്ക് കൊണ്ടുപോയ മൃതദേഹം നാളെ രാവിലെ തിരുവനന്തപുരത്ത് എത്തിക്കുമെന്നാണ് റിപ്പോർട്ട്. തോമസ്–അമ്മിണി ദമ്പതികളുടെ മൂത്ത മകനാണ് അനീഷ്. എമിലിയാണ് ഭാര്യ. ഏകമകൾ ഹന്ന (6 വയസ്).