പനാജി: ഇന്ത്യന് സൂപ്പര് ലീഗില് ഇന്ന് ഗ്ളാമര് പോരാട്ടം. എടികെ മോഹന് ബഗാനും ബെംഗളുരു എഫ്സിയും നേര്ക്കുനേര് ഏറ്റുമുട്ടും. ഗോവയില് രാത്രി 7.30നാണ് മൽസരം. കടലാസില് കരുത്തരെങ്കിലും കളത്തില് കളി മറക്കുകയാണ് ലീഗിലെ രണ്ട് മുൻനിര ടീമുകള്. അവസാന അഞ്ച് മൽസരങ്ങളില് ഒന്നില് പോലും ജയിക്കാത്ത ബെംഗളുരു എഫ്സിക്ക് ആകെയുള്ളത് നാല് പോയിന്റാണ്.
കഴിഞ്ഞ മൂന്ന് കളിയില് ഒരു സമനിലയും രണ്ട് തോല്വിയും വഴങ്ങിയ എടികെ മോഹന് ബഗാന് ഏഴ് പോയിന്റുണ്ട്. റോയ് കൃഷ്ണ ജനുവരിയില് ഫിജി ദേശീയ ടീമിനൊപ്പം ചേരാനിരിക്കെ കൂടുതല് തകര്ച്ച ഒഴിവാക്കുകയാകും ഹബാസിന്റെ ലക്ഷ്യം. പോയിന്റ് പട്ടികയില് ആറാം സ്ഥാനത്താണ് എടികെ.
ബെംഗളൂരു ഒൻപതാം സ്ഥാനത്തും. അതേസമയം ആറ് കളിയായിട്ടും നായകന് സുനില് ഛെത്രി ഒരു ഗോള് പോലും നേടാത്തതാണ് ബെംഗളുരുവിന്റെ വലിയ തലവേദന. പത്ത് പേരിലേക്ക് ഗോവ ചുരുങ്ങിയതിന് പിന്നാലെ ഗോള് വഴങ്ങിയത് പോലുള്ള പാളിച്ചകള് പരിഹരിക്കുകയും വേണം. എട്ട് ഗോള് നേടിയപ്പോള് 12 എണ്ണം അവർ വഴങ്ങിയിട്ടുണ്ട്.
Read Also: പെഗാസസ് സമാന്തര അന്വേഷണം; ബംഗാൾ സർക്കാരിന് എതിരെ സുപ്രീം കോടതി