തിരുവനന്തപുരം: ഇടതുപക്ഷ മുന്നണിയിൽ രണ്ടാം സ്‌ഥാനം ആർക്കെന്ന ചോദ്യത്തിന് പ്രസക്‌തിയില്ലെന്ന് കേരളാ കോൺഗ്രസ് എമ്മിനോട് സിപിഐ സംസ്‌ഥാന സെക്രട്ടറി കാനം രാജേന്ദ്രൻ. കേരള കോൺഗ്രസ് എമ്മിന് ഘടകകക്ഷി എന്ന പരിഗണന മാത്രമല്ല, ബഹുമാനവും കൊടുക്കുന്നുണ്ടെന്നും കാനം വ്യക്‌തമാക്കി.
സിപിഐക്ക് മുന്നണിയിലെ രണ്ടാം സ്‌ഥാനം നഷ്‌ടമാകുമോ എന്ന ആശങ്കയുണ്ടെന്നും പല തവണ തോറ്റവരാണ് കേരളാ കോൺഗ്രസിന്റെ പാലായിലെ തോൽവിയെ കുറിച്ച് പറയുന്നതെന്നുമുള്ള ജോസ് കെ മാണിയുടെ ആരോപണങ്ങൾക്ക് മറുപടിയായിരുന്നു കാനത്തിന്റെ പ്രതികരണം. 17 സീറ്റും 5 സീറ്റും തമ്മിലുള്ള അന്തരം എല്ലാവർക്കുമറിയാമെന്നും എൽഡിഎഫിൽ സിപിഐയുടെ സ്‌ഥാനം പോകുമെന്ന് പറയുന്നവർ കണക്കറിയാത്തവർ ആണെന്നും കാനം വിമർശിച്ചു.
കേരളാ കോൺഗ്രസ് എം മുന്നണിയുടെ ഭാഗമായപ്പോൾ തന്നെ സിപിഐ അവരുടെ എതിർപ്പ് പല തവണ പ്രകടിപ്പിച്ചിരുന്നു. ഏറ്റവും ഒടുവിൽ നിയമസഭാ തിരഞ്ഞെടുപ്പിന് ശേഷം അവലോകന റിപ്പോർട്ടിനെ ചൊല്ലി ഇരുപാർട്ടികളും പരസ്യ ഏറ്റുമുട്ടലിൽ എത്തുന്ന അവസ്‌ഥയുമുണ്ടായിരുന്നു.
Read also: പെൺകുട്ടിയെ പീഡിപ്പിച്ച് കൊലപ്പെടുത്തി; പ്രതിയെ വെടിവെച്ചു കൊല്ലുമെന്ന് മന്ത്രി
