കൊല്ലം: മത സൗഹാർദ്ദത്തിന്റെ, സാഹോദര്യത്തിന്റെ നബിദിനാഘഷമാണ് കൊല്ലം അഞ്ചലിലെ ഏരൂരിൽ ഇന്ന് നടന്നത്. അഞ്ചൽ ഏരൂർ ഇളവറാംകുഴി മുഹ്‌യുദ്ദീൻ മുസ്‌ലിം ജമാഅത്തിന്റെ നബിദിന റാലിയെ, ക്ഷേത്രം ഭാരവാഹികളാണ് മധുരം നൽകി സ്വീകരിച്ചത്. ശിവപുരം ശ്രീ മഹാദേവർ ക്ഷേത്രത്തിലെ ഭാരവാഹികളാണ്, നബിദിന റാലിയെ മധുരത്താൽ പൊതിഞ്ഞത്.
പള്ളിക്കും ക്ഷേത്രത്തിനുമായി ഒരേ പ്രവേശന കവാടവും കാണിക്ക വഞ്ചിയുമായി ജനശ്രദ്ധ നേടിയ ഇടം കൂടിയാണ് ഏരൂർ. ലോകം മുഴുവൻ ഈ മതസൗഹാർദ്ദം അനുകരിക്കണമെന്നാണ് ഭാരവാഹികൾ പറയുന്നത്. സംസ്‌ഥാനത്തുടനീളം പ്രവാചക സ്‌മരണയിൽ നബിദിന റാലികൾ നടക്കുന്നതിനിടെ, മത സൗഹാർദ്ദത്തിന്റെ നല്ല മാതൃകകൾ സാമൂഹിക മാദ്ധ്യമങ്ങളിൽ ഉൾപ്പടെ വൈറലായിരിക്കുകയാണ്. മത സാഹോദര്യത്തിന്റെ ‘റിയൽ കേരള മോഡൽ’ എന്നാണ് പലരും ഇതിന് അഭിപ്രായപ്പെടുന്നത്.
ഇതിനിടെ, മലപ്പുറത്തെ ഒരു നബിദിന റാലിയിൽ നിന്നുള്ള മറ്റൊരു കാഴ്‌ചയും സാമൂഹിക മാദ്ധ്യമങ്ങളിൽ വൈറലായിട്ടുണ്ട്. മഴയത്ത് കാത്തുനിന്ന പ്രദേശവാസിയായ ഷീന എന്ന യുവതി നബിദിന റാലിയിലെത്തിയ കുട്ടികൾക്ക് നോട്ടുമാല സമ്മാനിച്ച, മലപ്പുറത്തെ മതസൗഹാർദത്തിന്റ കാഴ്‌ചയും ലോകത്തിന് മാതൃകയാവുകയാണ്.
Most Read| ഇന്ത്യയുടെ ഒഫീഷ്യൽ ഓസ്‌കാർ എൻട്രിയായി ‘2018’
