തിരുവനന്തപുരം: അനധികൃത സ്വത്ത് സമ്പാദനത്തില്‍ ആരോപണം നേരിടുന്ന കെഎം ഷാജി എംഎല്‍എക്ക് എതിരെ അന്വേഷണം ആവശ്യപ്പെട്ട് ഡിവൈഎഫ്‌ഐ രംഗത്ത്. ഷാജിയൊരു അധോലോക കര്‍ഷകനാണ് എന്നായിരുന്നു റഹീമിന്റെ ആരോപണം.
2016-ല്‍ തിരഞ്ഞെടുപ്പ് സത്യവാങ്മൂലത്തില്‍ 47.80 ലക്ഷം ആസ്‌തി ഉള്ളതായാണ് കാണിച്ചിരിക്കുന്നത്. പിന്നെ എങ്ങനെയാണു നാല് കോടിയോളം രൂപ ചിലവ് വരുന്ന വീട് ഷാജി നിര്‍മ്മിച്ചതെന്ന് ഡിവൈഎഫ്‌ഐ സംസ്‌ഥാന സെക്രട്ടറി എഎ റഹീം ചോദിച്ചു.
ഇന്ന് വരെ ഒരു രാഷ്‌ട്രീയ നേതാവിന് നേരെയും ഉയരാത്ത ആരോപണമാണ് ഷാജിക്ക് എതിരെ നിലവിലുള്ളത്. അദ്ദേഹത്തിന്റെ ആസ്‌തിയില്‍ വന്‍ വര്‍ധനവാണ് ഉണ്ടായത്.സാമ്പത്തിക സ്രോതസ്സ് എന്താണെന്ന് ഷാജി വെളിപ്പെടുത്തണം.
2016-ല്‍ തന്നെ ഷാജിയുടെ വീട് അളന്ന് തിട്ടപ്പെടുത്തിയതാണ്. ഏകദേശം 4 കോടിയോളം വിലവരുന്ന 5660 ചതുരശ്ര അടിയോളം വലുപ്പമുള്ള വീടാണത്. എവിടെ നിന്നാണ് ഇത്രയും പണം ഷാജിക്ക് ലഭിച്ചത്, റഹീം ചോദിക്കുന്നു.
ഇഞ്ചി കൃഷിയാണ് വരുമാന മാര്‍ഗമെന്ന് ഷാജിയുടെ വിശദീകരണം. എന്നാല്‍ മുന്‍പ് സമര്‍പ്പിച്ച സത്യവാങ്മൂലത്തില്‍ ഇതിനെക്കുറിച്ച് സൂചിപ്പിച്ചിട്ടില്ല. സ്വയം അപഹാസ്യനാവുകയാണ് ഇയാളെന്നും റഹീം കൂട്ടിച്ചേര്‍ത്തു.
Read Also: ഗതാഗത നിയമലംഘനം; പിഴത്തുക കുറച്ച കേരളത്തിന്റെ നടപടി പുനഃപരിശോധിക്കാന്‍ നിര്‍ദേശം
