തൃശൂർ: കുതിരാൻ ദേശീയപാതയിൽ കഴിഞ്ഞ ദിവസമുണ്ടായ അപകടത്തിന് കാരണം ലോറിയുടെ ബ്രേക്ക് നഷ്‌ടപ്പെട്ടതല്ലെന്ന് മോട്ടോർ വാഹന വകുപ്പ് ഉദ്യോഗസ്‌ഥർ. ലോറി ഡ്രൈവർ ഉറങ്ങിയതാകാം മൂന്ന് പേരുടെ ജീവൻ എടുത്ത അപകടത്തിന് കാരണമായത് എന്നാണ് ഉദ്യോഗസ്‌ഥർ പറയുന്നത്. വ്യാഴാഴ്‌ച കുതിരാൻ ദേശീയപാതയിൽ നിയന്ത്രണം വിട്ട ചരക്കുലോറി ആറ് വാഹനങ്ങളിൽ തട്ടി മൂന്ന് പേർ മരിച്ചിരുന്നു. സംഭവത്തിൽ ഒട്ടേറെ പേർക്ക് പരിക്കേൽക്കുകയും ചെയ്‌തിരുന്നു.
ബ്രേക്ക് പൊട്ടിയതാണ് അപകട കാരണമെന്നാണ് ലോറി ജീവനക്കാർ പോലീസിനോട് പറഞ്ഞിരുന്നത്. എന്നാൽ, മോട്ടോർ വാഹന വകുപ്പ് ഉദ്യോഗസ്‌ഥരുടെ പരിശോധനയിൽ ബ്രേക്കിന് തകരാറില്ലെന്ന് കണ്ടെത്തി. ലോറി ഡ്രൈവർ ഉറങ്ങിപ്പോയപ്പോൾ നിയന്ത്രണം നഷ്‌ടപ്പെട്ടതാകാം കാരണമെന്നാണ് വിലയിരുത്തൽ. ഡെപ്യൂട്ടി ട്രാൻസ്‌പോർട്ട് കമ്മീഷണർ എകെ ശശികുമാറിന്റെ നേതൃത്വത്തിലുള്ള സംഘം നടത്തിയ പരിശോധനയിലാണ് ഇക്കാര്യം വ്യക്‌തമായത്‌.
ലോറി ഡ്രൈവർക്കെതിരെ മനപ്പൂർവമായ നരഹത്യക്ക് കേസെടുക്കുമെന്ന് ഉദ്യോഗസ്‌ഥർ അറിയിച്ചിട്ടുണ്ട്. അപകടത്തിൽ രണ്ട് കാറുകൾ പൂർണമായും തകർന്നിരുന്നു.
Also Read: വിവാദ മാർക്ക് ദാനം; തുടർനടപടികൾ നിർത്തിവെച്ച് എംജി സർവകലാശാല
