വെള്ളമുണ്ട: നിരവിൽപുഴക്കു ശേഷം വെള്ളമുണ്ടയിലും മാവോയിസ്റ്റുകൾ എത്തിയതായി വിവരം. വെള്ളമുണ്ട കിണറ്റിങ്കൽ പ്രദേശത്തുള്ള നാടൻഭക്ഷണ ശാലയിലാണ് ഇന്നലെ രാത്രിയോടെ ആറംഗസംഘമെത്തിയത്. സംഘത്തിൽ 3 സ്ത്രീകളും 3 പുരുഷൻമാരുമുള്ളതായാണ് വിവരം. ഇവർ അരിയും സാധനങ്ങളും ആവശ്യപ്പെട്ടതായി കടയുടമ വെളിപ്പെടുത്തി. വെള്ളമുണ്ട പോലീസ് സ്റ്റേഷനിലെ പോലീസുകാർ സ്ഥിരമായി ഭക്ഷണം കഴിക്കുന്ന കടയാണിത്.
ഇന്നലെ തൊണ്ടർനാട് നിരവിൽപുഴ ഭാഗത്തും മാവോയിസ്റ്റുകളെത്തിയിരുന്നു. 5 പേരടങ്ങുന്ന സായുധസംഘമാണ് മുണ്ടകൊമ്പ് കോളനിയിലെ രാമന്റെ വീട്ടിലെത്തിയിരുന്നത്. സംഭവത്തിൽ പോലീസ് അന്വേഷണം ആരംഭിച്ചു.
