ന്യൂഡെൽഹി : വിവിധ സംസ്ഥാനങ്ങളുടെ പക്കലായി മൂന്ന് കോടിയിലധികം ഡോസ് വാക്സിൻ ഉപയോഗിക്കാതെ ബാക്കിയുണ്ടെന്ന് വ്യക്തമാക്കി കേന്ദ്ര ആരോഗ്യമന്ത്രാലയം. രാജ്യത്തെ വിവിധ സംസ്ഥാനങ്ങളുടെയും, കേന്ദ്രഭരണ പ്രദേശങ്ങളുടെയും, സ്വകാര്യ ആശുപത്രികളുടെയും കയ്യിൽ ബാക്കിയുള്ള വാക്സിനുകളുടെ കണക്കാണിതെന്ന് കേന്ദ്രം വ്യക്തമാക്കി.
കേന്ദ്രത്തിൽ നിന്നും ഇതുവരെ സംസ്ഥാനങ്ങൾക്ക് വിതരണം ചെയ്തത് 45.37 കോടി ഡോസ് കോവിഡ് വാക്സിനാണെന്നും, എന്നാൽ പാഴായി പോയതടക്കം സംസ്ഥാനങ്ങൾ ഇതുവരെ ഉപയോഗിച്ചത് 42,08,32,021 ഡോസ് വാക്സിനാണെന്നും മന്ത്രാലയം വ്യക്തമാക്കി. കൂടാതെ നിലവിൽ വിവിധ സംസ്ഥാനങ്ങളിലേക്ക് 11,79,010 ഡോസ് വാക്സിൻ കൂടി എത്തിക്കാനുള്ള നടപടികൾ പുരോഗമിക്കുകയാണെന്നും കേന്ദ്രം അറിയിച്ചു.
കഴിഞ്ഞ ജൂൺ 21ആം തീയതിയാണ് ദേശീയ വാക്സിനേഷൻ യജ്ഞത്തിന്റെ പുതിയ ഘട്ടം ആരംഭിച്ചത്. അതിന് ശേഷം രാജ്യത്ത് നിലവിൽ ഉൽപാദിപ്പിക്കുന്ന വാക്സിന്റെ 75 ശതമാനവും കേന്ദ്രസർക്കാർ വാങ്ങുകയും അവ സംസ്ഥാനങ്ങൾക്കും കേന്ദ്രഭരണ പ്രദേശങ്ങൾക്കും വിതരണം ചെയ്യുകയുമാണ് ചെയ്യുന്നത്.
Read also : സ്വാതന്ത്ര്യദിനത്തിൽ പരമാവധി ആളുകൾ ദേശീയഗാനം ആലപിക്കണം; പ്രധാനമന്ത്രി