ഇസ്ലാമാബാദ്: രാജ്യാന്തര ക്രിക്കറ്റ് കൗണ്സിലിന്റെ (ഐസിസി) അടുത്ത ചെയര്മാന് സ്ഥാനത്തേക്ക് പ്രമുഖ രാജ്യങ്ങളായ ഇന്ത്യ, ഓസ്ട്രേലിയ, ഇംഗ്ലണ്ട് എന്നിവിടങ്ങളില് നിന്നുള്ളവര് വരരുതെന്ന് പാകിസ്ഥാന് ക്രിക്കറ്റ് ബോര്ഡ് ചെയര്മാന് ഇഹ്സാന് മാനി. ഇന്ത്യക്കാരനായ ശശാങ്ക് മനോഹര് ഇക്കഴിഞ്ഞ ജൂലൈയില് സ്ഥാനമൊഴിഞ്ഞത് മുതല് ഐസിസി ചെയര്മാന് സ്ഥാനം ഒഴിഞ്ഞു കിടക്കുകയാണ്. ഡെപ്യൂട്ടി ചെയര്മാന് ഇമ്രാന് ഖ്വാജ താല്കാലിക ചുമതലകള് ഏറ്റെടുത്തിരിക്കുകയാണ്.
ഇന്ത്യ, ഓസ്ട്രേലിയ, ഇംഗ്ലണ്ട് എന്നിവിടങ്ങളിലെ ക്രിക്കറ്റ് ബോര്ഡുകള് ഐസിസിയില് രാഷ്ട്രീയം കളിക്കുന്നതായി ഇഹ്സാന് മാനി ആരോപിച്ചു. അതിനാല് പുറത്തുനിന്നൊരാള് ചെയര്മാന് സ്ഥാനത്തേക്ക് എത്തുന്നതാണ് ഉചിതമെന്ന് അദ്ദേഹം നിര്ദ്ദേശിച്ചു. തനിക്ക് ഈ സ്ഥാനത്തേക്ക് മത്സരിക്കാന് താല്പര്യമില്ലെന്നും മാനി അറിയിച്ചു. 2003 മുതല് 2006 വരെ ഐസിസി ചെയര്മാന് സ്ഥാനം വഹിച്ച വ്യക്തിയാണ് മാനി. ബിസിസിഐ പ്രസിഡന്റ് സൗരവ് ഗാംഗുലി ഐസിസി ചെയര്മാന് സ്ഥാനത്തേക്ക് എത്തിയേക്കുമെന്ന് റിപ്പോര്ട്ടുകള് ഉണ്ടായിരുന്നു. ഇതിനിടയിലാണ് പാക് ബോര്ഡ് എതിര്പ്പ് പ്രകടിപ്പിച്ചത്.