നീലേശ്വരം: കേരളത്തിലെ ആദ്യ സമ്പൂര്‍ണ പെന്‍ഷന്‍ നഗരമായി നീലേശ്വരം നഗരസഭ. അര്‍ഹരായ എല്ലാവര്‍ക്കും പെന്‍ഷന്‍ ഉറപ്പാക്കിയാണ് നഗരസഭ ഈ നേട്ടത്തിലേക്ക് എത്തിയത്. നിലവിലുള്ള ഭരണസമിതി അധികാരത്തിലേറിയപ്പോള്‍ 3900 പേരാണ് സാമൂഹ്യക്ഷേമ പെന്‍ഷന്‍ വാങ്ങിയിരുന്നത്. എന്നാല്‍ ഇപ്പോള്‍ അത് 6709 ആയി ഉയര്‍ന്നു.
ഓഫീസില്‍ ലഭിക്കുന്ന പെന്‍ഷന്‍ അപേക്ഷകളില്‍ സമയബന്ധിതമായി ഉദ്യോഗസ്‌ഥന്‍മാര്‍ അന്വേഷണം നടത്തുകയും തുടര്‍പ്രക്രിയകള്‍ ക്ഷേമകാര്യ സ്‌ഥിരം സമിതി കാര്യക്ഷമതയോടെ നിര്‍വ്വഹിക്കുകയും ചെയ്‌തു. അതിന്റെ ഫലമാണ് സംസ്‌ഥാനത്തിലെ ആദ്യ സമ്പൂര്‍ണ പെന്‍ഷന്‍ നഗരമെന്ന പദവി.
ബാങ്കുകള്‍ വഴി നടത്തുന്ന പെന്‍ഷന്‍ കൃത്യമായി അര്‍ഹര്‍ക്ക് എത്തിക്കുന്നതിന് എല്ലാ കൗണ്‍സിലര്‍മാരും മുന്‍കൈയ്യെടുത്തു. കൗണ്‍സില്‍ യോഗങ്ങളിലും പെന്‍ഷന്‍ അപേക്ഷകള്‍ അംഗീകരിക്കുന്നതിനും അപാകതകള്‍ പരിഹരിക്കുന്നതിനും കൗണ്‍സിലര്‍മാര്‍ കൃത്യമായ ഇടപെടലുകള്‍ നടത്തി.
അംഗീകാരം നേടാന്‍ സഹായിച്ച റവന്യൂ, ആരോഗ്യ ജീവനക്കാരെയും അംഗന്‍വാടി വര്‍ക്കര്‍മാരെയും ബാങ്ക് അധികൃതരെയും നഗരസഭാ ചെയര്‍മാന്‍ പ്രൊഫ.കെ പി ജയരാജനും ക്ഷേമകാര്യ സ്‌ഥിരം സമിതി അദ്ധ്യക്ഷ പി രാധയും അഭിനന്ദിച്ചു.
Read Also: ‘തദ്ദേശ തിരഞ്ഞെടുപ്പ് നടക്കുക വിവിധ ഘട്ടമായി’; തിരഞ്ഞെടുപ്പ് കമ്മീഷണർ
